شعر عباس طريم
مشعان الجبوري يقول: كلنا حرامية
شعر عباس طريم
ينتشر الان عبر الفيس بك ومواقع الاتصال, منشور للسيد مشعان الجبوري يقول فيه: [نحن جميعا سراق وحرامية وانا سارق وحرامي ومرتشي اخذت رشاوي بملايين الدولارات , ونحن جميعا سبب دمار العراق]
عباس طريم
اعترف مشعان , كال احنه الافنديه
نلبس قوط , بس كلنه حراميه
+
اجينه انبوك , ما عدنه شغل بالناس
واحق الله! ورسوله وعمر والعباس
وانعل روح ابوه , الكال عدنه احساس
بفلوس الشعب , نحتفل يوميه
+
اني البالنزاهه .. اول الفساد
وليدفع اصيرنله , ظهر واسناد
الحرامي من يجينه انكله: ادفع داد
اذا يدفع , ابد منجيب طاريه
+
وصلنه البلد بالنهب , للافلاس
وخل يكتب قصايد , طز في عباس
ما نستحي امن الله ! نستحي امن الناس
اوقع , كلنه قفاصين اصليه
+
انا مشعان , اتحده السياسيين
اذا ردو اوكالوا : موش بواكين
هاي الفايلات .. اجمعهن امن اسنين
واكلهم بالوجه : انتم الهيبيه
+
انته مرتشي ؟ اي نعم كلت الهم.
ومو بس اني , لا بويه الربع كلهم .
يعترفون , اذا الاعلام يسألهم
وكل واحد , ايكول شكد مصاريه
+
انبوك وما يرف انه جفن وانخاف
لان كل عدل ما عدنه ولا انصاف
لعيبي طالما متفق , وي خصاف
خلي اينام , محمي باتفاقيه
+
معلومات عدي .. بس اخاف انطك
وما اكدر احجيهن , خويه طك ابطك
اسمعوا احمار جاري اعليوي , هالينهك
ايكل الكم , ايخاف ايكول , شنهيه ؟
+
ندري الشعب من الجوع ظل خاوي
لان المال كله فرهده الواوي
حاير دايخ , ومستفلس وداوي
ويسأل : [ من سرق ياترى الماليه؟]
+
ابوك وما اخاف , واحجي بالاعلام
وسوينه .. الابد ما صار بالاسلام
تتفصل علينه , جلمة الاجرام
وقليل ابحقنه , لو كالوا حماميه
+
كلت كلشي , بعد من عدي شتريدون؟
ما خليت شي ما كلته , انه الممنون
حجيت وكلهم ايسمعون , شيسوون؟
كل افلوسي , ببنوك العمانيه
+
+
ابوك وارتشي , واحسن من الباقين
اليبوكون ويسرقون .. باسم الدين
اليحلفون بالله ! كلشي ممسوين
وهمه الاغنه , في هالكره الارضيه
+
اعترف مشعان , كال احنه الافنديه
نلبس قوط .. بس كلنه حراميه