كـتـاب ألموقع

يالبواك وين اتريد اوديك// عباس طريم

 

الموقع الفرعي للكاتب

يالبواك وين اتريد اوديك

عباس طريم

اريزونا

 

الى حرامية بغداد.. الذين لا يستحون ولا يخجلون من الله! [وكل يوم حرامي بايكنه

وشالع , والربع يصعدونه بديهم للطائرة ويتقاسمون وياه الغنيمة]

 

يالبواك .. وين اتريد اوديك

واسفرك وين ؟ امر

ياضوه العين

+

لأوربه العزيزه , للبرازيل

لرومه, للمجر , لورايد

الصين

+

انجازك عظيم .. انذكره كل يوم

اوسالفتك اترددهه

الدواوين

+

 

وسام الحرمنه , ابصدرك يمهيوب

حرام انصير عن شوفك

بعيدين

+

 

يكانس جيب شعبي , الشايف الضيم

وامام الناس بايك

هالملايين

+

اتفضل .. هاي مفتوحه المطارات

وين اتريد تشرد؟ , كول

يازين

+

حجزنالك سياحي , ابأول الدور

لجهودك يا حرامي البلد

تثمين

+

وبعد نشكر , السهل سفرتك هاي

حراس الوطن .. والله

طيبين

+

 

بالنص , انته والفتحولك الباب

الك خمسين , والسفرك

خمسين

+

يحرسك ربي , ويحقق امانيك

اوعسانه انشوفك امنشنش

ابكين

+

حبيبي امودع الله , اوتوصل ابخير

اوسلم لي , اعله مادوني

اوهيلين

+

لا تهتم , بلدنه ابغير قانون

الحراميه .. بلدنه اليوم

مالين

+

ما دامك حرامي .. اوعدك افلوس

الربع كلهم يصيرولك

محامين

+

الف رحمه اعله ابوه الباكنه اوراح

اورحمه الوالديكم , صيحو

امين

+

عدنه ارجال , كل الزاد ثردوه

ولحسوهه لحس , كل

المواعين

+

ابشرك ياشعب , نبقه اعله هالحال

ناس ابوسط جنه , اوناس

حافين

+

جا وين العداله , والمساواة؟

وين الشرع , والاخلاق

والدين؟

+

وين اوعودكم , وين الخطابات؟

وبعد , وين الضمائر , واللبك

وين؟

+

من اجل الوطن , والصالح الناس

كل واحد اجانه ابهل

عناوين

+

ومن مطرت الدنيه اوفاضت الكاع

طلعت , وانكشف سمهه

الثعابين

+

وبعد ما اتشككت كل الشعارات

انكشف زيف الحرامية

الملاعين

+

الدول , كل الدول يضبطهه قانون

وعراق اليوم خالي امن

القوانين

+

روح اتمتع اوزور

الامارات

واتصيف برومه اوزور

برلين

+

روح , امودع الله الباب مفتوح

ايحرسك ربي من الحسد

والعين

+

واذا  شعب العراق , اتضاهر اليوم

التضاهر كول : شيفيد

المجانين

+

اذا يحجي  الشعب , ربعي اليسكتوه

ويدخلون الجميع .. ابجيم

وابسين

+

روح  اصرف افلوس , الحفظو الكاع

واللي دحرو الكوم

المعادين

+

باعو  روحهم  .. من  اجل  العراك

ورجعو للوطن , بس

بالجثامين

+

روح اصرف افلوس  , العلو الراس

وزيد ,اعله الحقير , النجس

قاطين

+

روح  , الله !  يمهل  كل  النذال

وما يهمل .. عقابه العين

بالعين

+

 

ضحيه الوطن صار الكم , يحراس

وابناء الشعب صارو

قرابين

+

اذكركم  ..  بان  الله!  موجود

وهوه الياخذ , ابحك

المساكين