كـتـاب ألموقع

يـَ (الكرخي) بس دلينه// ميسون نعيم الرومي

• 

تقييم المستخدم:  / 0

سيئجيد 

المجموعة: ميسون نعيم الرومي

تم إنشاءه بتاريخ الأربعاء, 15 كانون1/ديسمبر 2021 19:28

كتب بواسطة: ميسون نعيم الرومي

الزيارات: 1577

ميسون نعيم الرومي

عرض صفحة الكاتبة 

يـَ (الكرخي) بس دلينه

ميسون نعيم الرومي

نصحونه نصبر نصطبر– ندري الصبر ياذينه

صرنه يربي مكفخه – ياهو اليجي يولينه

مدري قشامر صدگ ! – واجلاف تلعب بينه

واللي يصدگ النذل – مگرود وامضيع موازينه

والله الصبر ياذينه

***

لا شغل عدنه لا عمل – حسره علينه الفلس

حلت علينه الصدقه – هلسوْ وطنه هـَـلس

التـُهم عدهم جاهزه – واسهلهه طلقه اوحبس

عقدين مرّ امن الزمن – بس موت المخاوينه

اوندري الصبر لاوينه

***

-(بغداد) صارت تابعه – جيـران تلعب بيهه

گطعـَـوْ الماي ابقصد – حكـّامنه اتجاريهه

عطشت الگاع اتصحـّـرت – ياهو الذي يرويهه؟

يا ناس! المن نشتكي؟ - سافل مرتشي الوالينه

هذا الصبر چاوينه

***

اشِـفـّـنـَه يربي امن العمر؟ – حروب اورعب موت اوقهر

ثـروات عـِـدنه امتلتله – حصتنه حزن اوسـَـهر

اولهه (دكتاتور) العصر -  وانوبه ولد الفگـر

لعبونه زوج اوفرد – ابنار او جمر شعلونه

صار الصبر ياذينه

مدري شنو تالينه

*يـَ (الكرخي) .. رد اعلينه

------

*الكرخي الشاعر الشعبي العراقي المعروف عبود الكرخي -(1861-1946) نظم الشعر باللهجة البغدادية

نظمت هذا النص على غرار قصيدته المشهورة (المجرشة)

-----------------------------

ديسمبر/2021

ســتوكهولم

• < السابق
• التالي >