كـتـاب ألموقع
ألـِف شكراً كربلاء// ميسون نعيم الرومي
/ 0
- المجموعة: ميسون نعيم الرومي
- تم إنشاءه بتاريخ الأحد, 04 آب/أغسطس 2019 20:11
- كتب بواسطة: ميسون نعيم الرومي
- الزيارات: 2140
ميسون نعيم الرومي
ألـِف شكراً كربلاء
ميسون نعيم الرومي
ألـِف شكراً كربلاء
والأهلنه الأُصلاء
دَخـْـلـَـت الفـَرْحـَه الگـَـلبنه
بعد ما شـِـفـْـنـَه البلاء
يا (حسين) البيهه ثائر
يا نصير الضعفاء
وانت بالحق سيف قاطع
يا منار الفقراء
ألـِف شكراً كربلاء
***
يا (حسين) الماكره أبدا ضياء
يا (حسين) الوفه اتعلمناه منك
من ابوك اوگبله جدك
گالهه (الله جميل)..
او ربك ايحب الجمال
والفن أساس امن الحياة
والدليل اخت الرسول
شاعره ابصوتٍ جميل
(شيماء) وابكل المعارك
تشدو بانغامٍ شجيه
صوتهه .. طرّ السماء
ألـِف شكراً كربلاء
***
تحمل اشگد اوتعاني..!
يا بلاد الأنبياء
ما شفت راحه ابحياتك
وانت معروف ابصفاتك
حـُكمـِـتـَـك حفنة رعاع
نهر ثالث جره ابأرضك
وابدماء الشهداء
والشعب مل العناء
ألـِف شكراً كربلاء
***
حـُكـّامنه ابهذا الزمان
لاشبيه الهم ولا الهم مثيل
الحـَـرْمنه .. الهم دليل
خانـَوْ اوباعوا أرِضنه
أبـد ما عدهم ولاء
باگوْ الثروات كلهه
لا خجل عدهم ولا ذرة حياء
موبقات اوبيهه نـِشرَوْ
من حشيش اوبيع أعراض النساء
اوحتى دورٍ للبغاء
خـِنـْگـَوْ الفرحه ابگلبنه..
آخ .. يا خيبة شعبنه
بالچذب طمغـَوا گصصهم ..
كلشي عملوا بالخفاء
شوْهـَوْ الدين ابدجلهم
والدين من عدهم براء
ياشـــباب .. الخير بيكم..
الأمل انتم والرجاء
ألـِف شكراً كربلاء
***
وانتَ يا مهد الحضاره
صرت لول بالفساد
لا مدارس لا مشافي لا شوارع
لا تقدم.. لا زراعه اولا حصاد
لطم وامغـَطـَّه ابسواد
حاربوك ابإسم الله.. اوبسم دينه
صرت سـَـهـْـل الانقياد
اشوكت تطرد هالذئاب..؟
انت ابن سومر اودجله والفرات
شـَـوّفوك الجوع وارهاب اوعذاب
ابصدرك اتلاگي الرصاص اوما تهاب!!
انهض .. ثور اعله ذوله ..
وانقذ اهلك والبلاد
غـَـنـّي وابصوت اليتامه والأرامل..
غني وابصوت الجياع
للوطن يحله الغناء
ألـِف شكراً كربلاء
ألـِف شكراً كربلاء
-----------------
مهداة الى جمهور ملعب كربلاء الأولمبي واهل كربلاء
ومنظمي حفل افتتاح بطولة غرب آسيا لكرة القدم
--------------------
ســـــــــــــــــتوكهولم
4 / آب / 2019
المتواجون الان
862 زائر، ولايوجد أعضاء داخل الموقع
