اخر الاخبار:
قصف اسرائيلي يستهدف محيط دمشق - الأربعاء, 28 شباط/فبراير 2024 20:04
  • Font size:
  • Decrease
  • Reset
  • Increase

اجـَـلبـنـّـك// ميسون نعيم الرومي

تقييم المستخدم:  / 0
سيئجيد 

ميسون نعيم الرومي

 

عرض صفحة الكاتبة 

اجـَـلبـنـّـك

ميسون نعيم الرومي

 

اجلبنك يليلي والگـلب سابيني

حسبه اجيبني وحسبه توديني

الاوي بالصبر والصبر يلويني

كلش صلف مايعرف العيبه

اجلبنك يليلي الف تجليبه

***

اجلبنك يليلي اوتيهيت الراي

الـَتــّـمْهـَه اوتـِطش متعانده وياي

كافـيـنه هضم اتوسلچ دنيايَ

خلصنه العمر بالآه والخيبه

اجلبنك يليلي الف تجليبه

***

اجلبنك يليلي والسهر خاواني

اترجه الجفـن والنوم جافاني

قسه حيل الوكت والعجب راواني

واصوابه كلف ماعنده كل طيبه

اجلبنك يليلي الف تجليبه

***

اجلبنك (يليلي) وامعاتت آنه اوياك

تحفر بالزمن واتجيب هاذي واذاك

تنسه؟ ابد متگلي ليش اشجاك

عذبت الگلب  جـَـتــَّـك امصيبه

اجلبنك يليلي الف تجليبه

***

اجلبنك يليلي والدنيـّه دواره

يلفط لفط والبوگ هم كاره

يوم القريب او نسمع اخباره

ما دامت أبد احترم هالشيبه

اجلبنك يليلي الف تجليبه

***

اجلبنك يليلي والوطن راح اوضاع

اضباع افترسته..لا ابد موش اسباع

واحدهم نـذل لا يشبع اولا ينصاع

مليارات امتلتله بحسابه وابجيبه

اجلبنك يليلي الف تجليبه

***

اجلبنك يليلي والشعب نايم نوووم

تعلم ع الظلم ماعـِنـده بس اللوم

يلطم  لطم..والعيشه ع المقسوم

عيشة مذله او هضم يحسبهه خو طيبه

اجلبنك يليلي الف تجليبه

***

اجلبنك يليلي والحچي ضايع

يرضه اشلون گلي الفقير الجايع

سيطر ع الحكم سافل للوطن بايع

واليكره وطنه ارصاصه ريت اتصيبه

اجلبنك يليلي الف تجليبه

***

اجلبنك يليلي واتمـَعـْنه باللي صار

عقدين امن الزمن بالوطن شبت نار

-(خرفان) صرنه.. والحبل بيد (الجار)-

يلعـب لعـب ياعـيبة العـيـبه

اجلبنك يليلي الف تجليبه

—---------------------------------------------

4 / ديسمبر / 2023

ســـتوكهولم

للاتصال بالموقع

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.