نـشـــيد الفاســدين // لطيف پولا

• 

تقييم المستخدم:  / 0

سيئجيد 

تم إنشاءه بتاريخ الجمعة, 30 كانون2/يناير 2015 17:52

كتب بواسطة: لطيف پولا

الزيارات: 1562

اقرأ ايضا للكاتب

نـشـــيد الفاســدين

لطيف پولا

صارت طولة يا حَسنة ,العَبي بيها العَبي!

                          أجتمع فيها الساقط والحرامي والغـَبي

الشرف ما يوكلچ خبز, والحَياء خـَلْ  يوَلـّي

                       والچ كل المكاسب تجيچ من جوا العِبي

             صارت الچ يا حسنة العَبي بيها العبي

ما خـَلولنا گشّايا, خذو المايا وصرمايا

                      والشعب خـَلْ ياكل حَو وخـَل يصيح شگد ما بي

لغفوا فلوس النفط وحرگو كل الفايلات

                      ووَّزعوا  ارض  الوطن  للسمسار  ما متربي

            صارت الچ يا حسنة العبي بيها العبي

لا تسمعين صوت  الضمير وكل شي تطلبي يصير

                      مخططهم  عالمي  وهذا  شغل   أجنبي

ولا تخافين من الشعب  تلاث ترباعه  بالدرب

                     بين نازح وبين مهاجر وكلها تصيح : وينك رَبّي!

            صارت الچ يا حسنة العبي بيها العبي

شـبعنا من المواعيد والفساد كل يوم يزيد

                      يمتى تجي يا عيد ,عيونا عل الفرج تربي؟

نسمع الخطب عل الشاشات وما توصل يَم القضاة

                      والفاسد  بكل وزارات  هم بعد تتعجبي ؟

           صارت الچ يا حسنة العبي بيها العبي

جيشنا يحارب الارهاب وبدمه يروي هل التراب

                     والفاسد ابد ما تاب,شربي يامعودة شربي !

باگو القاصا وما بيها حاميها حراميها

                      بس عَمته يرضيها وحدهم صاير نبي

            صارت الچ يا حسنة العبي بيها العبي

ماجينا يا ماجينا حلي الچيس وانطينا

                       فرغوها الخزينة والباقي مجهود حربي

سَوَّو الدنيا مناحة بكل بيت وشارع وساحة

                      بيدهم سيف وجـِدّاحة اذا ما تصدگين جـَربي

              صارت الچ يا حسنة العبي بيها العبي

نارهم وَجَّت بالوطن والفاسد يجني النِعـَم

                      احترگ بيها الأيزيدي تركماني والصُبّي

وهَم بعد يدفع ثمن اشوري وكوردي وعوربي

                       ما يخلون بيها شريف لا وطني ولا أبي

             صارت الچ يا حسنة العبي بيها العبي

ما يبقى واحد نظيف لازم مثلچ ينعدي

                  والفاسد جاب الإرهاب لا خايف ولا  مُتخبي

هاي خطتهم يا حَسنـَة والباقي جوا  العِبي

                    ويسد حلقج بمصاصة لا تحچين ولا تعتبي

             صارت الچ يا حسنة العَبي بيها العَبي

هذا شعب الحضارات رجعونا لعصر الغاب

                 عصر الغزو والثارات وإبادة وسلب وسبي

ما سلمت حتى الاثار ولماينشال حرگو بنار

                   راح نداين من الجار من أردن وابو ظبي   

إن چان طبيبك ذيب شتترجى منه گلبي ؟

                  والسيل جرف الآمال چانت شراعك مركبي                         

 هذا يومج يا حسنة العبي بيها العبي

                   شراكة صورتو بيها ساقط وحرامي وغبي 

• < السابق
• التالي >