شويعر من اهل بغداد// عباس طريم

• 

تقييم المستخدم:  / 0

سيئجيد 

تم إنشاءه بتاريخ السبت, 22 نيسان/أبريل 2017 17:23

كتب بواسطة: عباس طريم

الزيارات: 3106

الموقع الفرعي للكاتب

شويعر من اهل بغداد

عباس طريم

شويعر من اهل بغداد .. وسط السواك اغني] ..لن اجريو ابو الطليان .. كله بالخشم طكني

____________

كالو عدنه حريه .. صارت ميه بالميه

ومن مريت بمريدي .. غنيت ابحماسيه

ولن اجريو ابو الطليان.. ذب ابلوزه ظل عريان

اجاني وبيده ساطوره .. وكلي حضرة الفنان

كلي اشعدك اتغني ؟

شويعر من اهل بغداد .. وسط السواك اغني

لن اجريو ابو الطليان .. كله بالخشم طكني

+

اجاني وعاض السانه .. وكلي اشعدك اهنانه ؟

وسط السمج والكراث .. واتغني دنه الدانه ؟

صلخني ابكله صاحت طن ... وكلي ابراحتك ظل ون

كتله اجريو سامحني .. ما ظل عدي سالم سن

كشول كل البجيبي .. وصاح ابصوت يعريبي

الضيف ايحب سمج بني

[شويعر من اهل بغداد .. وسط السواك اغني]

لن اجريو ابو الطليان ... كله بالخشم طكني

+

اجاني شارب اسويكه .. وكلي اتغني اشبيكه

كتله اغني من ضيمي .. وابد ما جبت طاريكه

ب يساريه غلك عيني .. وغنالي يناسيني

شردت اوعفت قندرتي .. وهوه ايصيح تانيني

لا تشرد يظالمني

[شويعر من اهل بغداد .. وسط السواك اغني]

لن اجريو ابو الطليان .. كله بالخشم طكني

+

صحت يابو الدجاج ايدك .. وكلي كلشي ميفيدك

اله اتغني للساهر .. عبرت الشط على مودك

واول ما صحت ويلاه .. كريمد صاحلي وعلاه

كل هذه الحميس البيك .. واترد للغنه , رباه؟

واجاني وكالي : ثني ؟

شويعر من اهل بغداد .. وسط السواك اغني

لن اجريو ابو الطليان .. كله بالخشم طكني

+

كالوا هذه جاي ايبوك .. شبعوني كتل بالسوك

حته الجاي يتسوك .. اجاني وذب عليه اذروك

كتله خويه كافي الدك .. كلي انبطح واسكت لك ؟

والله من تفك حلكك .. وروح امريدي اشكك شك؟

وكل الراهي عاوني

شويعر من اهل بغداد .. وسط السواك اغني

لن اجريو ابو الطليان .. كله بالخشم طكني

+

صحت ها خويه ابو الزوري .. واجاني وكالي دوري

اريد اليوم احمسنك .. حميسه ابهذه ساطوري

كلت ما اغني التوبه .. ويشهد راضي ابو الروبه

واطيكم عهد ياقوم .. اسافر فورا الكوبه

ووقع بعد ما اغني

[شويعر من اهل بغداد .. وسط السواك اغني]

لن اجريو ابو الطليان.. كله بالخشم طكني

+

ابحوض السمج ذبوني .. وغسل بالحوض غسلوني

واهل الركي والبطيخ .. اجو للحوض شالوني

براسي الركي اتكسر .. وابو البطيخ ما كصر

خلاني اذب بطيخ .. وكلي هذه للتاريخ

باجر ينذكر عني

شويعر من اهل بغداد .. وسط السواك اغني

لن اجريو ابو الطليان .. كله بالخشم طكني

+

شلت فانيلتي بيدي .. وصحت ادخيل يمريدي

بعد ما غني اتوبه .. اذا غنيت كص ايدي

وكلي وقع انه اهنا .. عمرك ما تمر منا

واذا طبيت لمريدي .. وغنيت وصحت ويلا

اطيح صبغك , اعذرني

+

شويعر من اهل بغداد .. وسط السواك اغني

لن اجريو ابو الطليان.. كله بالخشم طكني

+

جريو اوربعه شالوني ... اوسط الخيس ذبوني

بسلامة عمري من الموت .. اجوني الناس هنوني

كلت ياروحي اغني المن .. اشرد للهند احسن

لان المطرب ابغداد .. اذا ما ينسحل ينجن

ورحت يم زايرة شوغه .. ولعنت الشعر لابو الفن

[ واشعليه انه من الناس ... واشعله الناس مني ]

[شويعر من اهل بغداد .. وسط السواك اغني]

لن اجريو ابو الطليان .. كله بالخشم طكني

• < السابق
• التالي >