يا دار جاي اسألچ// ميسون نعيم الرومي
- تم إنشاءه بتاريخ السبت, 25 تموز/يوليو 2020 10:23
- كتب بواسطة: ميسون نعيم الرومي
- الزيارات: 2362
ميسون نعيم الرومي
يا دار جاي اسألچ
ميسون نعيم الرومي
مريت يم دار الولف
والدمع طاح امن العين
لن ولفي شال اوهجر
ضيع العشره امن اسنين
ما ودع اوراح ابعجل
لا گال سافر ليوين
يا دار ضاع الوفه
مزنه اوخذتهه الرجلين
***
مر النسيم او سأل
يا دار اهلچ چا وين
اظلم صفت بيه الغرب
يا دار چنتي التزهين
يشكي الصدى ونته اسمعت
اطلاله تنحب تدرين
يا دار اهلچ گضوا
بسچ بعد واتنطرين
***
هل الدمع يچوي الجفن
دمعچ جره واتنوحين
الروح عذبهه الوكت
مجروح الگلب بي جرحين
حتى الصبر مل الصبر
يوسف جزع من اسنين
ملينه مللنه الوكت
والزمن يركض للبين
***
يا دار جاي اسألچ
هم ضل اثر للطيبين؟
هم الوفه عندچ بقه
لو بس حزن واتونين
احچايات عدنه ابكل كتر
لوضاع كلشي اوتنسين
يا دار ما ضل عتب
لا دمع بيهه العينين
مريت يم دار الولف
والدمع طاح امن العين
---------------------
24 / تموز/2020
ســـــــــــــــتوكهولم
المتواجون الان
607 زائر، ولايوجد أعضاء داخل الموقع