• الى أبالسة الشَر

شعر: د. مظلوم الجوادي

الى أبالسة الشَر

( ليتني أسطيعُ بث الوعي في بعض الجماجم لأصون الدين عمّا ينطوي تحتَ العمائم )

محمد صالح بحر العلوم

ياوحوشٍ سابحه ابدم البشَر

تره ضاگت , وصلت الگطع النحَر

**********

ياعمايم عشعشت كل السنين

يا وعاضٍ خدم بس للمفسدين

يا فتاوي امفصِّله بلباس دين

امنين اجيتوا لعنة الله اعللقدَر

************

آية الله ثـور مربوط ابحبل

من تفحصه ابلا عقل وكْبَر خِبل

عاف دينه اوبالسياسه يغتسل

طاح حظ هیچی عمايم كلها شَر

**************

اتسابقوا عالبوگ ركضة مارثون

اوعكسوا الآيات للحق كارهون

ابغير دولاراتهم ما يؤمنون

والدجل عندهم أحله امن الشكر

***********

گوم ياشعب اغتسل من هلاقذْار

سوّي صحوة وعي ونطيهم انذار

ثور بوجوه الفسق ثورة احرار

اوگُبَل للمحرقه سوٍّيهُم وذر

**************

وبني بيتك ياشعب حُر اوسعيد

اولا تعيد الخطأ وِسْعَدْ من جديد

وبالتآلف تصبح أقوى امن الحديد

ابلا هواده كافح انواع الحشر

************

صير إيد إبئيد وحمي هالبلاد

علّي سورك وعْتِلي هذا الجهاد

او وزِّع اللگمه على كل العباد

لا تَفَرَق هالشعب كلهم بشـر

********************

د. مظلوم الجوادي

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.