عباس طريم
جنت ما اعدي من اسمع تفاهات
عباس طريم
القصيدة منشورة في ديواني الاخير
_____
جنت ما اعدي, من اسمع تفاهات ... وهسه اليوم كمت اسمع واعدي
وجنت مثل المسودن من يجيسوه ... ما اصبر ثواني اعله التعدي
ما اغلس ابد, لو ادنك الراس ... الغلط ينرد عليه بالمثل , عدي
ومن ينصحني ابوي اويحجي وياي ... ويكلي اعله كيفك يالافندي
كلمن كال " بز " تتلاطش اوياه ... ومثل "الجلب" تنهش , باليعدي
شما ينصحني ابوي النصح ميفيد.. وادير الوجه وامشي اعمل " البدي
اليوم اتغيرت كل المفاهيم ... صامت صار , ما ينسمع ردي
وكمت ارخي الحبل , لو غيري شداه.... واخذ يتلاشه وي الزمن شدي
صرت اصبر واطول الخلك مرتين .. واكل للروح , ياروحي تهدي
غيرني الزمن , والهم والسنين ... والشيب الطلع , سواني جدي
صرت انه الابو , واتغير الحال ... وكمت ادفع بدي, دفعة المردي
التجارب علمتني انحني, واللريح ... اسمح , من تمر فوكي وتعدي
العواصف زودتني ابدنيتي ادروس .. واول درس , من تعلك , اهدي
لا تتناطح امكابل اوي الثور ... ينعل والديك , ايكول جدي
تأنه اوصير صاحب عكل بالضيج .. اوصاحب راي وي الناس وردي
كبرنه اوبعد كبرت كل العيال .... وتعب من الحمل والشيل , زندي
وسكتنه امن الردي والحيل تعبان ... اليجيب ابجلمة الزفره , ويودي
ومن ابن الحرام , ايلوص ايكوم .... اكل للروح هاج الخلك , مدي
والتضيج الخلك , جلماته وياي ... اداريه بالتي , مو بالتعدي
واظل اترس ابجدره واوكف اوكوف .... رغم ما اترس , ويرجع ايبدي
قاموسي تبدل والزمن دار ... ومرن سواني دهري , اوموش حدي
وكمت اهدي الربع للخوه واللين .... واحذرهم امن الشد والتصدي
الفلك دار اوغزاني ابغفلتي الشيب .... لفاني اوتيهت جزري اومدي
كطع بيه العزيز, الجنت اخاويه .... واللي يعتبر درعي اوزندي
الدنيه اتغيرت , والدهر خوان .... وزمان الجان اليه اشتغل ضدي
والهم والتعب والمرض والضيج .... والغربه وجرحهه الدوم يدي
التمن , مثل واحد يطلب ابثار ... وعرف ثاره اليطالب بيه , عدي
ابد ما استسلمت وانه ابوسط ضيج .. ولا خليت جف ايدي , اعله خدي
عرفت الوكت شد اوياي الحراب .... وراحت وانتهت ايام سعدي
عزيز وما شلت رايتي البيضاء ... ونفضت اتراب حالات التردي
دخلت المعركة وادريني خسران .... وشلت باليمنه رايات التحدي
وشفت روحي ابوسط من لا يرحمون .. ادير الوجه بين اعداي , وحدي
شفت دهري وزماني وكل السنين .... وشبابي الضاع,حرت منين اعدي
وشفت عمري العشت وياه ستين .... يضحك عالجره اواكف ابسدي
وشفت كل ربعي عالتله اويضحكون .... كل واحد ايكول ايطيح , ودي
دخلت الساحه وحدي بطرك رجلين.... مثل امر ابحرب, صادر الجندي
اوكلت ياروح ما ظل ألج فزاع .... كومي اوياي عالكلفات , شدي
هاي اخر حرب خلصت الجولات ... بعد ما ظل عذر , عدج وعدي
عليج اتوجهت ساير الجبهات ... كالتلي : انتهيت , وهذه حدي
نعم , مليت من كثر المشاوير ... هلك جدمي وتلاشه , اوكع جلدي
ثكل جدمي وصعب اعبرهه الحدود ... وما اكدر ارد , لو كتلي ردي
الجرس رن وعرفت ابروحي مطلوب... وللدك الجرس ارجع , مردي