كـتـاب ألموقع
من البكتوه الخاطر ربكم انطونه// عباس طريم
/ 0
- المجموعة: عباس طريم
- تم إنشاءه بتاريخ الثلاثاء, 05 كانون2/يناير 2016 11:07
- كتب بواسطة: عباس طريم
- الزيارات: 2458
من البكتوه الخاطر ربكم انطونه
عباس طريم
اريزونا
عراق اليوم , ياهو السان قانونه؟
شو بس عالفقير الحك
يطبقونه
+
الناس اتكول راتبنه بعد شهرين
بالمنشار , من النص
يكصونه
+
لان النفط نازل سعره حيل اهواي
والكص , يسري لحد ما
يغلونه
+
جا من ارتفع هالنفط عشر اضعاف
كلي ابروح ابوك , الربع
شطونه؟
+
مليارات راحت كلهه للاحزاب
وشعبنه ظال بس اتلصلص
اعيونه
+
ياقانون بويه الجاي عالحفاي
شايل سيفه بيده , وحاد
اسنونه
+
ياقانون هذه الكال : كلهه الزيد
واخوه اللح عمر , حافي
يخلونه
+
ياقانون هذه الكال : بيت وجاه
وراتب للعرف واعمال
ينطونه
+
والخريج محتار ويدور اشغال
واعياله تدور عله
الصمونه
+
ينطون العرف واليتبع الاحزاب
والما يتبع الهم , عيب
ينطونه
+
المو باحزابهم , يندفن جوه الكاع
ولبأحزابهم , للسمه
ايرفعونه
+
ياقانون .. يرضه الشعب بالبلدان
متاني الكفر , من عدكم
ينقذونه
+
القانون : العدل والرحمه والانصاف
عدكم غير هالقانون
شوفونه؟
+
انتخمتو من الاكل , والشعب ميت جوع
واكلتو الزاد كله , وحته
الصحونه
+
حرامية كبل , من الغني ايبوكون
وينطون الفقير , المستحق
عونه
+
وانتم لا فقير , ولا غني ابهالكاع
صارت يكه وحده , الكل
تشلحونه
+
من ياطينه انتم , ايها السادات
رحمه الذاك حجي اعناد
فهمونه
+
اجانه الفكر والوسواس والخناس
ولفانه الكدر والهم , من
لفيتونه
+
ولكم خافو ربكم باجر اتموتون
من البكتوه , لخاطر ربكم
انطونه
+
ما ادعي عليكم , لان رب الكون
كل لص وحرامي ايحفظه
ويصونه
+
بعد ما ادعي , كل ما ادعي عالبواك
ارد افلاس , والبواك
يغنونه
+
ويرموني ابمصيبه اورطه سوده اوضيج
والبواك من كلهن
يخلصونه
+
بعد ما ادعي , كل دعواتي بالمكلوب
اذا كلت احفظ محمد
يسجنونه
+
دعيت الله مره ينسجن عبعوب
حط بامريكه , واتعشه ويه
مادونه
+
عباس طريم