أفضل وصفة طبية في تاريخ البشرية! عراقية طبعاً؟
نيسان سمو
بصراحة آني هذا العنوان (أقوال وحِكم الشيوخ) أعجبني واستهواني ويمكن راح أچلب بيه. موضوع يستحق العناية والرعاية والاهتمام لتطوير نحو الأفضل لمستقبل الإنسان والبشرية! لازم أنسويلهم دعاية!
يقول معمم: فأهل البيت عليهم السلام والصلاة بإمكانهم ان يرجعوا وهاي كبيرة (كفر وشرك بس أگولها! هو گال مو آني) آدم عليه السلام إن أرادوا! صلي على محمد وآل محمد! أهل البيت بإمكانهم إرجاع آدم عليه السلام! إي عمي وين راح يرجعوه؟ ما گلتنا وين راح يرجعوه! وين راح يحطوه وشراح يشتغل إذا رجع؟ بعدين إذا هو ماقبل يرجع إشلون بهاي الحالة؟ غير تروح تسأله اول شيء! هسة ما أنريد يرجع بس يجيبونه صورة له حتى نعرف إشلون كان جدنا الأولي! وبعدين بصراحة سؤال إمحيرني إذا رجع جدي راح اسأله إشلون اتكاثرنا من رجل وإمرأة واحدة! يعني احنة اخوة للجميع! لو أولاد حرام؟ لو شنو القضية، إشلون اتكاثرنا وانت اصلاّ ماكان عندك بنات! يعني كلنا من نفس الأم! او إشلون؟
يقول الشيخ المجلل والكبير صالح الفوزان: الميت إذا وضع في قبره ودفن في التراب وتولى عنه المشيعين وإنه ليسمع قرع نعالهم! كما قال الرسول! يعني من يرجعوا هو يسمعهم وهم راجعين، يسمع صوت نعالهم! يأتيه ملكان منكر ونكير! يگعدوه ويسولفون شوية وياه، وبعدين يقولون له گوم نلعب شوية شدة! شده عادية مو پوكر! ماعندنا حجر الپوكر ويانا! بعدين يُكمل النظرية العلمية وبعدها يأتوا له بفراش ويطير فيه للجنة! تكون الحورية بإنتظاره! طلعت زوجته في الارض من شافها ضرب على رأسه بالبرميل ويلطم شوية بعدين يذب نفسه ويرجع للأرض! بس الملاك وياه وياه مايخلي ينجرح! وهو راجع ينسى مفتاح الجنة بجيبة، فيقول له الملاك ولا يهمك هسة راح ارجعَ آني، إنتظر شوية بهذا البار أسحبلگ اركيلة الى أن ارجع! راح جاب المفتاح بَس طلع المفتاح غلط إنتهى الدوام!
يقول الداهية عثمان الخميس: وعندما سأله أبو هريرة عن بناء الجنة قال: لبنةٌ من ذهب، ولبنةٌ من فضة، ميلاطها المسك، حصبائها الؤلؤ والياقوت، ترابها الزعفران، مخلدون لا يموتون، ينعمون ولا يبأسون، لا تبلى ثيابهم ولا يفنى شبابهم! هؤلاء أهل الجنة!
انت شوف الوصف، هكذا كلام وْلا بلاش، وصف دقيق جداّ، يعني واحد مشتغل عمالة سنوات فوق يعرف طابوگة طابوگة! لعد إشلون الشغلة هيصة وعربدة، لا يا عمي لاء! يعرف حتى ميلاط الحائط! بّس نسى يُگول چان اكو صوندة يرشون حيطان الجنة بماء الزمزم! هاي راحت عليه! دير بالك يا شيخ مرة ثانية لا تنسى تذكر الصوندة وحنفيه الماي وسطلة اللبخ ونوعية ملابس العمال!
يقول الشيخ السابق: رداً على سؤال، نعم بول الإبل طاهر، كل المؤكولات اللحمية، الدجاج، البقر، الماعز، الكنغر، وغيرها بولها طاهر، وسمح للمسلم بالصلاة في مرابض الغنم وفيها بولها وريحته! فأبوالها طاهرة ولكن لا يجوز شربها! هاي ما افتهمتها! يعني إذا كان بول النعجة طاهر فليش لا يجوز شربه، يعني بس للسباحة مثلاّ! ويقول لا يجوز شربها إلا للضرورة وهو العلاج فقط! يعني اخي الكريم إذا إشتهيت بول الكنغر يجب أن تُمرض نفسك حتى يسمحوا لك بفنجان! وإذا لم تشفى خذ گلاص اكبر بس لا تشربه سادة، قوي خاف تسكر، خلي شوية زيت الزيتون التركي فيه! مع شوية تبولة يمشي الحال!
يقول الشيخ بن عثيمين رداً على سائل! لاء، لا يجوز قول صدق الله العظيم بعد نهاية قراءة القرآن! هذا لا يجوز، والنبي لم يفعل ذلك، إذاّ بدعه! بس يا شيخ وعيونك الحوة ولحيتك الجميلة كل المسلمين في العالم يقولون صدق الله العظيم بعد الإنتهاء من قراءة القرآن! يعني كل هذه السنوات وهذه القراءات كانت بدعة وكبيرة! يعني تعبهم راح ببلاش! يعني للنار! مشركين، كُفار، شنو حالهم، إشراح يصير بيهم! ليش جاي متأخر انت عليهم! مو اكثر من اربعة عشر قرناّ وهم يقولون ذلك! راحت فلوسك يا صابر! وينهي السائل سؤاله أفتونا مأجورين! هاي جابلك الاجر ارتاحيت؟، كل صلاتك راحت ببلاش! يعني لو ما سائل مو أحسنلك! هسة لازم ترجع من اول وجديد! ترجع للوراء هواية، هواية مو شوية!
سؤال للشيخ فوزان: لماذا لا يُكفر السيد قطب لأنه سبّ الصحابة وذكر كلام غير لائق في نبي الله موسى؟ يقول الفوزان على كل حال هو اخطأ في هذا ولا ندري ماذا كان في آخر امره وربما كان مقلداّ لكتب الشيعة، هو مقلد، نحن نحسن الضن به ولا يصل حد الكُفر إنشاء الله! يعني إشلون يا شيخنا! يعني إشلون هو مقلد ويسب بكيفه؟ تقبل آني أسير مقلد وأحجي بكيفي؟ لو لازم أصير اخواني اولاً! يعني بشرفك إذا كان واحد يهودي او نصراني قال ماقاله قطب ماكان أقامت عليه حد الرد!؟؟؟؟؟
شوفوا هذا السؤال الذي جاء بعد السؤال السابق لنفس الشيخ! يقول جدتي ماكانت تُصلي كسلاّ وتهاوناّ ولكنها كانت مؤمنة بالله ورسوله فهل يحق لي الرحمة عليها وزيارة قبرها؟
الجواب: كلا وألف كلا، لا يجوز الرحمة عليها او زيارة قبرها (إلا إذا كانت النيه في ردمه) فهي كافرة! كل مَن يترك الصلاة وله عقله فهو كافر، إلا إذا كان اسمه قطب هَم فكرة!
سائل جديد للفوزان: فضيلة الشيق وفقكم الله قضاء فترة العسل لزوجان في الخارج ما حكم الشرع في ذلك؟ يقول الشيخ: في أي مكان إذا كان في داخل البلد في مكة او مدينة او داخل العمرة (هو رايح شهر العسل لو شهر الصلاة) او داخل بلاد المسلمين لابأس في ذلك، أما إذا مسافر للخارج فهذا لا يجوز، السفر إلى بلاد الكفار لايجوز، ولكن مسموح لي أن تكون لي رتل من العشرات السيارات الفارهة المصنوعة بأيدي ومصانع الكفار، فهذا يجوز! اعلم أننا معتمدين عليهم في كل شيء حتى في حماية أوطاننا من اخوتنا الحوثيين ولكن السفر عندهم ممنوع! السفر لشراء الأسلحة والدراسة والتدريب والتعليم كلها شرعية ولكن لغرض النكاح لاء، وألف لاء، شنو تروح تنكح زوجتك في جذر الكفار! بلكت شافك واحد منهم! راح يتعلمون التجربة النكاحية الإسلامية، شنو اتريد يسرقون حضارتنا؟ انت همينا يا ابن الناس انكح وسافر منو جاي سائل وراك! يعني ما ترتاح إلا الفوزان يبارك نكاحك! ارتاحيت هسة، أبقى جوة وأنكح بهذا الحار! لو شد على نفسك بطانية وروح للعمرة! خلي زوجتك عند الجيران! هكذا شعب فعلاّ يستحق هكذا مشايخ!
يقول سائل أي سورة تقرأ على القبر الفاتحة ام الإخلاص!
الرد المزلزل: لا قراءة على القبور لا الفاتحة ولا الإخلاص، ولا شيء من القرآن لأن هذا بدعه ما ورد عن الرسول القراءة عند القبور! ارتاحيت؟ كل موتاكم صاروا بدعة لأنكم تصلون على القبر! كل العملية طلعت غلط في غلط! وكل صلواتكم عليهم طارت في الهواء، راحت ببلاش، حتى موتاكم يلعنونكم في قبورهم إلى هذا اليوم! شنو القضية هذا الدين ما يعرفه احد؟ كل واحد يشتغل بْكيفة! يا عمي غير تسأل وبعدين تدعي او اتصلي او تترحم، يمكن تدخل في المومقات! شغلتك كلها طلعت غلط! تعال روح اقنع الباكستاني والأفغاني والسريلانكي والسنغافوري والأفريقي والعجمي والليبي والسوري الأموي والعراقي الملتهب وباقي ارجاء المعمورة الإسلامية بأنه حرام قراءه الفاتحة على القبر! بشرفكم هذه العملية مو أعقد وأصعب من الوصول إلى مركز الشمس! والله أصعب حتى من الدخول في الثقب الأسود والخروج من الجهة الثانية دون أن ينحي الضوء!
واحد مهرج يرقص (چوبية) على المنبر يقول: عندما يُدفن شخص في وادي السلام في النجف الأشرف او يدفن في الوادي الأيمن في كربلاء كل دفن له ميزة خاصة، الدفن في وادي السلام يدفع عنك ضغطة القبر، اكراماّ لأمير المؤمنين صلوات الله عليه، اما الدفن في الوادي الأيمن في كربلاء شيسوي! يرفع عنك حساب منكر ونكير اكراماّ لسيد الشهداء، ليش الناس تتقاتل حتى تدفن في احدى الوادين! طيب ما اعرف ليش ما كمّل وگال أما الدفن في مقابر السنة يرفع ضغط الدم للميت، والدفن في مقابر المسيحيين يرفع الكولسترول ويخفض دقات القلب وتزداد عنده الرجفه الفحيصية للذراع الأيمن، اما الدفن في مقابر الكفار فيرفع هرمونات الميت فيقوم ويصيح كالمجنون أريد مسكن للهرمون!
ويرقص (نفس المهرج) ويقول: ما الفرق بين الله عز وجل وبين النبي وآلي محمد (صل الله عليهم وسلم)! فرقان لاغيرهما، فرقان لا ثالث لهما. الفرق بين الله عز وجل والنبي، والفرق بين الله وامير المؤمنين، الفرق بين الله وإمامنا الهادي فرقان فقط، شنو هما؟ إمامنا قال هُم عباد الله، وهم خالق الله، الله الذي خلقهم! فيسأله احدهم اما الفرق بين الله وبينهم في العلم، يقول ماكو فرق، الفرق بين قدرة الله وقدرتهم، ماكو فرق، الفرق بين حياتهم وحياة الله، ماكو فرق، إنتهى الفرق!
يا ابن الناس إذا كان الفرق الاول هو إنهم يعبدون الله والثاني الله خلقهم فكيف لا فرق بين الاثنان! انت راح اتخبلني! يعبدوه وهو خالقهم ويقول لا فرق بينهما غير بأرضية الملعب، هذا اصطناعي وذاك طبيعي! ما اعرف اكو فار فوق حتى نعيد هذا التسلل؟ والغريبة في العلم والمقدرة والحياة لا يوجد فرق يقول الحكم الدولي! يعني من حق المسيحي يقول الپاپا هو الله بنفسه! ليش انتعب أنفسنا ونبحث عنه فوق وهو بصفنا، الشارع الوراني من بيتنا! من تركيا تكدر تروح سباحة واتشوف الله في الفاتيكان!
نفس المُهرج يقول (هو مقطع طويل ولكن سأبتره لأن الصداع بدأ يصعد) يقول الراقص: الله خلق النبي وأصحابه قبل آدم بأربعة عشر ألف سنة! إي والله هذا ماقاله حرفياً، لاء وكان يرقص على المنبر وهو يقول ذلك! الجهمور كان يبكي ويهز أحياناً. يا عمي إذا لم توقفوا هذا المهرج راح يرسل كل شيعة العراق للشماعية! إي صادقاً، راح يجننهم ويعلمهم الرقص الغربي.. شوفولة حل!!!
يقول اجملهم وأرتبهم واثقفهم عن عوّج ابن عُنق، وقيل ابن عناق، فيما يتعلق بهذا الرجل عندما اتو إليه، او جاءوا عنده (طبعاّ هو لايعلم مَن جاء ومّن كانوا) فرآهُم في بستانه، فأخذهم واحداّ واحداّ وجعلهم في كرمه مع فاكهتهِ، فاعطاهم عنقوداّ من العنب الأسود، فما استطاعوا حمله إلا بعد أن اجتمعوا عليه (إي مو العنقود كان غواصة إلمانية)، وذكروا أن عوّج او عوج طوله اكثر من ثلاثة آلاف ذراع (يعني مثل المستشار الألماني الحالي، يمكن هذا الألماني حفيد عوّج)! ويقول أن هذا الرجل من ابنة آدم قد زنت (شنو قضية آدم والزنا! كل بناته زانيات، بعدين انت إشلون تعرف بنت آدم وهي اول إمرأة في التاريخ قد زنت)؟ ويقول أن هذا الرجل كان في عهد نوح! (ابن الطرطورة قبل لحظة قلت انه ابن بنت آدم الزانية، آدم وين ونوح وين! مو اكو أربعون ألف سنة فرق بين الزانيين، آسف اقصد بين آدم ونوح)! وهو لما جاء الطوفان لم يصل الماء إلا إلى كعبيه (يعني صار لقلق)، ولما فاض البحر لم يصل عمق البحر إلا إلى شقويه (يعني خصاويه)، ويقول كان يأخذ السمك من قاع البحر ويشويها على حرارة الشمس (يعني چان اكو باربكيو سابقاّ! او يمكن هذا العنق بنى الاهرامات)! هذا العوّج يمرر هكذا عنب على الجالسين المساكين! ولا واحد منهم يسأله أي سؤال! الكل جالس وفاتح عنقة ومنتظر العنب الأسود! مبسوطين لسماع عن هذا العنق بالرغم من انه كان ابن زانية! يكيفون عندما يسمعون زانية! يا شيخ اقسم بشرف عُنق ماكو غيرك زاني! لا والله! أموت اعرف من وين يجيبون هكذا احاديث! وماذا سيقولون للعالم ولنفسهم عندما تُرفع الستارة! شنو عبالكم راح تبقى هكذا مغلقة! لا بد أن تنجلي! بعدين روح اشوي سمك على حرارة الشمس! لا تنسى تأخذ وياك التوابل، يم الشمس ماكو دكان بهارات! اللعنة عليك يا ابن عُنق العنقود! يمكن كلمة العنقود جايّ من اسم عُنق! يا عُنق واخيراّ عرفنا سر العنقود! نَعنَعك الله إي والله!
ما أگدر ما اذكر الشيخ والعلامة الكبير، كبيييير أوي السيد الشيباني: تعالوا نسمع سوية هاي الوصفة والنظرية الكمومية الحديثة! إمرأة تتصل به وتقول ياشيخ عندي بنت عمرها عشرون سنة ولكنها قرعة تماماّ حتى حواجب طايرة! يقول قرعة قرعة؟ تقول نعم قرعة خالص، ياساتر ياساتر يرد عليها! ثم يأتي بنظريته الكيمائية: يقول تحلقيها صفر على الخالص، صفر صفر، يعني يتفطر الجلد! وإتجيبين گونية حنطة قديمة (يقصد گونية الحرب العالمية الأولى)، ما إتكون خيوطها لايلون! وتلفيها وتحكيها برأسها إلى أن يتشقق الجلد، يعني يطلع الدم، وبعدين إتجيبين چرچفة خنزير (والله هاي الچرچفة ما مارة عليّ) ويقول راح اتشوفيها موجودة موجودة! (يا اختي إذا ما شفتيها بالسوگ روحي للنجف إهناك موجودة)! ولفي رأس بنتك بچرچف الخنزيرة وإعطيها مُسهل يكون قوي جداّ بشرط تبقى ساعتين بالحمام وخليها بالبيت لا تتطلع ثلاث أيام بشرط لا يضرب عليها الهواء، لأن إذا ضربها الهواء يتفطر الدماغ! إي والله هذه كانت مقولته ونظريته الحديثة! وبعدين أخذيها للكوافير (لاء هاي نسى يگولها)! هاي آني راح أقولها من عندي يمكن نسى الرجال! يا اختي بعد ثلاثة أيام وقبل أن يتفطر الدماغ يكون الشعر قد وصل للظهر! انتِ قبل هذا أخذي موعد وية حلاق لبناني شاطر للأحتياط! وجيبي تكسي ومباشرة والچرچف الخنزيري على رإسها گُبل للحلاق، خلي شمسية على رإسها حتى لا يضربها الهواء، يروح تعبنا ببلاش! وانتِ في الطريق إلى الكوافير يكون معك مجلة حتى تختاري على أي موديل راح اتقصي شعرها! والشعر المقصوص لا ترميه، دير بالچ جيبه للبيت وخلي بالفريزر راح تحتاجيه الصيفيه الجاية! يمكن أتفطر الدماغ من جديد، او صارت تشققات خفيفه إتحكي الشعر المجمد برأسها، بس هاي المرة بدون إسهال، ثلاثة مرات ورة الأكل!
الشغلة سهلة والنظرية ظريفة ومعتمدة عالمياّ بس ما اعرف هاي الأم من وين راح إتجيب دوا إسهال قوي، هاي صعبة، لازم ينطوها أكلة هندية حارة! ماكو غير چارة، أو كلاص ماي من ترعة الناصرية!
ألله يخرب بيتك يا الشيباني، يعني ليش عقدت الموضوع على الأم! يعني انت خبير وعالم وتعلم بالغيب فليش ما أعطيتها نظرية شفهية غيبية بدل هاي العملية المعقدة! يعني كان إتمرر عليها فيكة من فيكاتك الهوائية وخلاص، من وين راح أتشوف الأم چرچف الخنزير يا خنزير؟ إلى أن أتشوف الأم چرچف خنزير وگونية حنطة مصنوعة قبل الحرب العالمية الأولى راح اتصير الأم هي هَم صلعة! بعدين ليش الخنزير الحرام! يعني جلد فروج، نعزة، نعجة، بقرة ماكان يمشي الحال!!!! يعني وين راح إتشوف الام الفقيرة شرشفة خنزير بالعراق! تعال روح دوّر بالنجف وكربلاء على جلد خنزير!! بشرفكم هاي مو أفضل وصفة طبية عالمية على مر التاريخ!!!!!!!! استر يا رب! وينك! تعال شوف الآلهة العراقية الجديدة! ليش عايفهم يلعبون لعب بشعبك! (حبيبي أنت الشيباني، إذا تملك كل هذه القنابل النووية ماعندك قُنبلة صغيرة تضرب بيها القانون الجعفري! راح يكون لك أجر عند الله)!
عزيري الإله: إذا جيت لا تنسى ربي يحفظك إتجيب وياك كم قطعة من چرچف الخنزير بَس للاحتياط مو لغير شيء! وبدربك لا تنسى كيس طحين فارغ!! يكون قديييييييم هواية!!! مُهتريء، حتى لما نلصقهُ بجلد الرأس يتفتت ويتحول للشعر بسرعة! الشيباني ماعندَ وقت!! إذا اكو شوية حَب أحمر ماشي!!
نيسان سمو 15/10/2026