كـتـاب ألموقع
بـغـداد يا لحن الغـزل// ميسون نعيم الرومي
- المجموعة: ميسون نعيم الرومي
- تم إنشاءه بتاريخ الخميس, 03 أيلول/سبتمبر 2020 18:52
- كتب بواسطة: ميسون نعيم الرومي
- الزيارات: 1853
ميسون نعيم الرومي
بـغـداد يا لحن الغـزل
ميسون نعيم الرومي
بغداد .. يا لحن الغزل
شمس اوگمر ضي العين
نجمات بخدودي ضوت
اسمچ احروفه اوتدرين
لو صاحوا اسمچ بغداد
تزهر اضلوعي ارياحين
***
دجله عذب كلش عذب
طعمه الرطب ويه التين
افيش الربيع ابديرتي
قداح اليعط والياسمين
درت الغرب درت الشرق
بالگلب انتي اتعيشين
***
صوت النخل غنوة طرب
خضر ابروحي ابساتين
شريان مظفور ابسعفته
والگلب يركض ليوين
خضراوي برحي او گنطار
ياقوت مرجان ابلاتين
***
بغداد .. يا حب الأزل
نقش انوشم عَ اللجبين
شكتب شگولن ؟ بغداد..
اشعار تكفي ادواوين
اسمچ عله ابعالي السمه
بنت الرشيد التزهين
***
تتقاسم الخبزه اويه الجار
اهلچ كرام او حلويـن
لو مر غريب او محتاج
مو بس هله .. هلاوين
كلـَّه الدلال ايلوگ الچ
تتبغدد اهلچ .. تزهين
***
انتي العلم انتي الفن
القبله .. فدوه اتصيرين
بـغـداد طولچ فرديه
ايدچ التِعـْلـَه الإيدين
***
نثري الشعر..عـَـلـّي الراس
بغداد .. ابد متنخين
لا لا .. ابد متضيعين
متضيعين
-------------
2/تشرين الأول/2020
سـتوكهولم
المتواجون الان
632 زائر، ولايوجد أعضاء داخل الموقع