ستين أعبرت -//- شعر: حامد كعيد الجبوري

اقرأ ايضا للكاتب

حامد كعيد الجبوري

ستين أعبرت

الى عاشقة الورود زهرتي وملاذي

سبحان ألآله الخالقك بلور

أكَـبُّر من حلاتك صاغك أبعرفه

عاين ع الجنان وشال صم أتراب

عجنها بمي ورود وصيرَك نطفه

وخبطها أبمي عَنب من جنة الفردوس

خمره وتحت شفتك للمحب وصفه

عتّقها أبعسل وأنتظر عشر أسنين

عشره و عشره زادك قُدرته ولطفه

أسبّح شبكتك ما تشبه المخلوق

على أزنودك أصَحيِّ وبينهن أغفه

وأسبّح من حلاتك يا طعم جمار

غزت طولك حلاوه وفاضت الشفه

*****

أحب كلك دلالك خطوتك طاووس

أمروتك لا غنج من تطلع أبرأفه

يا في السدر يا نبعة الرمان

يا تين أستوه وما نوصل القطفه

شايل غيض نهدك والفرج مسدود

ونهود العذاره الحسدتك صلفه

نيمني أعله صدرك وأشتهيتك نوم

ويا نوم العوافي أشاه ما أدفه

ضوكني العسل حنظل طفه الزردوم

يا خمرة وصالك رشفه أثر رشفه

محتاجك تجيني وخاطرك ملموم

وأفرشلك كليبي وأشتعل لهفه

وينك يا دفو روحي بصليل وشوك

تعال أشعل أعيوني وأنتظر زفه

وينك يا نِفَس ردلي ويرد الكيف

أكرب جيس ناري وبالوصل تطفه

اشوفك والحجي يشرد لوين يروح

أختض من أشوفك وأرتجف سعفه

يمر طيفك حلم وأتنطر الملكاك

وأقرالك دعه يا سيد العفه

أسويلك حرز مكتوب بسم الله

ناجح والنجاح البيكم أنوصفه

ميت من زمان وبيك أرد الروح

سعاده الموت يمك والهجر حتفه

يارب الدلال الصار والماصار

عليلك والعليل بشوفتك يشفه

خيالك لو خطف ميت وأفز ردود

أذب تراب كبري وأستعد وكفه

يا رب الحسن يمكفر الطاغوت

ستين أعبرت والعمر ما كفه

****