حيّ أعله الشهادة -//- شعر: حامد كعيد الجبوري
- تم إنشاءه بتاريخ الخميس, 22 آب/أغسطس 2013 18:21
- الزيارات: 1605
حامد كعيد الجبوري
حيّ أعله الشهادة
الى الشهداء البؤساء الذين قدموا أرواحهم لتبقى الكراسي السود متسلطة على الرقاب
ها كد يا وطن دمك يشهّي الذيب **
لأن دمك دسم وملوحته أتغزر
لذلك ذاع صيتك والذئاب تحوم **
تاكل مزتك تشرب دمه وتسكر
من دمك(علي)ما يابس المحراب **
يطوف الكون دمك والحزن فجّر
يصيح الله وأكبر لا وطن إلاك **
يا خير الأوطان أنخلق وأتصور
يا أطهر أتراب الغيرة والنوماس **
وأترابك طهارة الكل رجس طهر
بيه ريحة ( محمد ) وأنبياء الله **
قرابين الرسل وبدمهم أتعطر
بيه عزم الطفوف وغيرة العباس **
دم (حسين) بيك وللمجد كبّر
حيه أعله الشهاده يأذن (الكرار) **
تتناخه الزلم حياك وتبشّر
مزار أنت العراق وآيتك قرآن **
فرض أمحبتك والشانئك أبتر
****
ننزف للدماء ولا نصيح الغوث **
عراريس الجنان وعالفخر تفخر
تتحده الظلام الجاي مدري أمنين ***
ونعرفها السيوف الكاتم وخنجر
بصدور العرايا نواجه الأشرار **
مثل حسين نوكف نرخص المنحر
(أبن ملجم) تناسل (شبث والحجاج) **
(يزيد وحرمله) والغادر الأعور
عذرا مو جبن منهج رسول الله **
أنأمر يصبر علي و ياليت لا يؤمر
علمنَه السماحه والصبر حيدر **
ومن يغضب حليم الغضبته أحذر
فضائيات دمنه وتفضح الطاغوت **
نحجيها الحقيقة أبدقة المصدر
لا مجلس أمن يفرض أمن مزعوم **
ولا أديان تحجي ومذهب أستنكر
ولا صاحب بخت ينفض عبات الغيض **
ولا كرسي السياسيه عالدمه يشغر
بعد بينه صبر ونفضي خلك الموت **
بعد بينه ( الحسين وقاسم وأكبر )
****
المتواجون الان
648 زائر، ولايوجد أعضاء داخل الموقع