• قصيدة : روض
- تم إنشاءه بتاريخ الإثنين, 15 تشرين2/نوفمبر 2010 12:21
- الزيارات: 2357
حامد كعيد الجبوري
· قصيدة : روض
جمعتنا القلوب وفرقتنا الأديان ،
سلام لقلوب السلام
ضيعتهم ...
ضيعت ...
وآنه الضعت
السمه ملعب للنجوم
نجمه جوبيه تدور
ونجمه تلعب شوشليه
ونجمه طشت ويهليه ...
هلبت إيرد الحبيب
النجم من يتعب ينام ...
وللصبح نجمه ضوت
روض ...
روض يانسمة شمالي
يظفر السنبل حرير
إيركص الكذله دلال
على أعيون البحر تسبح
والصدر ...
وثبة فرس
إبهيده يتعنه المراسي
والزمن مرود غوه
وكلبي عشج ....
وغير عشج ما هوه
روض ...
يافزة كطايه
أبفي نبعها ...
إتلملمت كرصَـة نده
إيسولف البستان بيها
ويفتحلها الجوري ثوبه ...
وتزهر أغصان الورد
وكطره كطره ...
كطره كطره
أتفيض روحه ...
يكبر وينزل برد
إتضحك إشفاف السواجي
وتترس الجوه خضار
روض تتثاوب إحديثه
والوكت طرة نهار
روض ...
روض من تكبل أعذيبي
عنبر وريحة سعد
إتحزم الجمار إلها
ويفرش النرجس إثيابه
ورد يتلكه الورد
إبروح أبوك إمنين فاتت
عكد يسأل من عكد
روض ...
روض ضيعت المحطه
لا قطار الصاعد أمحمل إبشاره
ولا قطار النازل إيشيل الخساره
والمحطات إشكثر ...
نزعتني إثياب صبري ...
ولبستني أهدوم غازلها الصبر
حبيبه صارت روحي موكد
جمر ... وأحلامي جمر
حبيبه ... كلبي
كلبي تارسلج سوالف
تنكتب أترف قصيده
ويقره شيطان الشعر
حبيبه روحي ...
روحي طوك أصياغه صبي وينشتل
ليلو والركبه ضريح ...
للصحائف رتّل أبوحي الخدود
نذر يشتم النهود ...
وينصلب
ع الصدر خشبة مسيح
حبيبه ...
حبيبه أشبع موت ...
بيج وأستريح ...
موت وأستريح
***
الجامعه المستنصريه
1973 *
* : رفعت مفردات وأضيفت أخرى عام 2009
المتواجون الان
382 زائر، ولايوجد أعضاء داخل الموقع
