• سطوح أهلنه
- تم إنشاءه بتاريخ الأحد, 28 تشرين2/نوفمبر 2010 10:05
- الزيارات: 2358
شعر: حامد كعيد الجبوري
· سطوح أهلنه
مهداة للشاعرة المثابرة الأخت وفاء عبد الرزاق
26 ت2 / 2010 م
زغار
نصعد أنرش السطح
إسطوح فقره
أترابه بيه ريحة أهلنه
أمن العصر أفرش سريري
بين أمي وبين أبوي
وينزل أبحضني الكمر
يسمع أسواليف أمي
سهر مره ...
يريد يتعلل ويانه
يستمع مُر السوالف ...
نام بفراشي وبجه
ومن دمعته
بللت ثوبي العتيك
تجوي دمعات الونين
بللت كل السواجي
وفاضت الدنيه حزن
وأمي ...
أمي تحفظها النواعي
أزغيره من غابت أخيتي ...
إسنين مرت
ودمع أمي ما خلص
أبجي وياهه البجيها
إزغار ما نعرف الموت
نحسب الدنيه هلاهل
ونرسم الباجر شمس
خذت من أمي طبعها
وبالفرح أشبع بجي
يمه كالتلي وليدي ...
الدمع بعيونك حرام
والبجي ...
أيعذب الميت ...
ويحرم أعيوني المنام
وهاي بنوات المحله ...
يا وليدي
كلهن أبشرع الله ... خواتك
ومن هذاك اليوم لسه
كل بنات الطرف خياتي ...
وأحبهن
أمي كالتلي أبكلشي
وأبد ما فد يوم كالت
تالي عمرك يا وليدي
أتصير إلك خيّه حنينه
من إسمها ...
ينترس عمرك وفاء
وتسكن أبديرة غُرب
وأكرهت من الزغر ...
جلمة غريب
.....................
المتواجون الان
872 زائر، ولايوجد أعضاء داخل الموقع