كـتـاب ألموقع

• المجالس الأدبية في الحلة - تتمة / صفحة 2

 وإزاء طلبات الحضور قرأ الأستاذ حامد كعيد القصائد التالية  للشاعر موفق محمد.

يا مطر زخنه محنه

 

يا مطر اركص عصافير وسنابل

 

 ويا مطر زخني هلاهل

 

ويا مطر نث كلبي وردة إتسولف ويالريح وأدزلك رسايل

يامطر حطني على بالك مالي غيرك يشهد

إترابي عليّ وروحي طينة من يمسهه الغيم آخ الغيم تتفطر نساتل

يا مطر زخهه إبحلاتك والله تلكاهه عسل عالشفة سايل

يا مطر حطني على صدرك خلني ارضع من حليب الغيم عاداتك ونجي زفة بلابل

 

إتغرد على التين فدوة التين دومة التين عايل

وارد اغني الروح طير وشاجله اجناحه المناجل

وارد اغني المطر فلني يمه توه المطر نازل

ويا مطر بوس على كيفك كلبي كلي أحساب كل ألبوس واصل

يا مطر هدني أرد أنكرك وانته بالغيمة وطيرلك

حمر لا خالي جيكيات اطيرلك زواجل

وبالسمه نكلب فرح نكلب غرام

ديج ينده ديج طيره إتفلي طيره

ويا حلاة البوس فوك البوس والدنيه مطيرة

 

 إنبشر الطيبين يمعودين رد إلنه مطرنه الغاب عنه

إركص إركص يامطرنه

إركص وزخنه محنه

***********

يا مطر لفني إبعباتك

وبلل إترابي تره إترابي عطش جم

كيظ شايل

ولمني نخله

مزنه مزنه

مزنه حب ومزنه دهله

ومزنة من مي الفرات إتزخ نوارس

فوك دجله

ومزنة من كاسك يبو النواس تضوي

الليل كله

ومزنه فله

إتسكر الواوية كلهم وكلمن إيبوك على رسله

ومزنه حله

إتلم حليب الغيم كله

وتنده العشتار إترضعنه محله إتزق محله

وأترس إشليلي مطر حالوب يا هو الجان يمعود

دخيلك ارد اطير وياك واتنفس كذايل

وتدري خالي الكذله ورده الكذله هلهوله

ضوه إبراس الجدايل

يا مطر طكني إبسبحتك خرزة خرزه

وخلي شاهودك إبئيدي وآنه أبيت

ومن اصيحن بات إنزل يا محلنه

وأكعد أكعد

أكعد أكعد

وأفتح اليمنه دخيلك بقن هالنهدين

لفني الدنيه كمره

وارد أذبن ليل حزني

وأسكر إبميتك أغني

يا ديج يابو عرف

كعد حبيبي الترف

كله المطر تلني

خدرني جني إبحلم

خل يجي إيلعبني

إينزعني ثوب المطر

وبميته إيضمني

********

يامطر زخني أرد ابوسك حبه حبه

ويا مطر ركصنه بيدك

خلي نترادم فرح وأنطك محبه

************

يا مطر غني الهوه إبظهرك وغني

ودكلي إصبعتين رد إلنه فرحنه الشال عني

وأسمع البوسات ريانه الشفايف

تعتلك وتضوي ميك

كلهن إحديثات عالصوبين يتلالن حسن

واليروي صدرك

يا مطر والخاطر الله الخاطر السياب ابو غيلان

مر بينه المسه وحفظنه شعرك

يا مطر لفني على خصرك

****

يا مطر طكني دخيلك كلشي عدنه

وارد اركصلك كمر بالروح يتماوج محنه

ولمني طينه ودوفني إبمي الورد

دوف غطيني إبحنينك

ارد اطك شجرة محبه إتضوي من طاريك

وتخضر فخاتي

من تهزهه الريح والله إتصيح باسم الله بناتي

ونام صدري وهزني امطرلك عسل بوسات

ترجيات عيديات وشتامر اغاتي

وطير تلكه ابصدري عشك

وغني وآنه اسبح إبحسك

مره اكاوي

ومرة حداري على طولك يا كمرنه العاري

وبوسه بوسه اشرب حليبك يا كمرنه

إمبرعمين إنرد لهلنه

يا ديج يابو زلف

عوعي على راس الولف

كله المطر هزني

ولفني ابكلايد شذر

خل يجي اينزعني

ويعلكلي شمعة عرس

وبميته ايزفني

******

يا مطر طك كلبي غيمه

غيمه مفروشه على كدنه آنه وحبيبي

غيمه مليانه حنان

غيمه ناسيهه الزمان

غيمه تتمرجح امان

غيمه من جف الشمس تشرب غرام

غيمه تتطاير حمامات وسلام

*******

 

                            صدك يلطولك حمام

 

إلى يم من اجل حفنة جذب

 

صدك جيلطولك حمام

أجناح فوك أجناح رف كلبي

 

وقره عليك السلام

وعودتني أنطير عالي أنطير بجناح الغرام

نكتب أبنجمة على الغيمات أسمنه

وتركض الغيمة ونمطرها على الدنيا سلام

ولفنه طوك هلال حبنه وصرنه واحد

بالتمام

اتكلي الله وياك ممنوع الكلام.

***

امنين اكيسك

وانته حسنك ورد رمان وضوه وهيل

وكصايب

اشدهني طولك

جيت أعاتب

ويا حمامة البيك أعاتب

ردت اكلك شرد اكلك

وانته تدري جيوش داستني المصايب

 ومالي غيرك يشهد الله

ويشهد عليك الإمام.

***

ويا غريب ويا كمر يضوي على طولك يا حبيب

بيا ندة أتطرز أكليبي واستحي منك وأغيب

بيك أغيب

وانزع ثياب الغريب

ألدنيه وحشه وحيل سوده

وياكل بلحمي الصليب

ونورتني وكتلي هانت

وحالف وياك النصيب

جاشجاك ابفالة عميه تزرف كليبي

وتنام

***

لك أنا أمعلم على ألدنيه وخنكه

وسجه روحي ويا قطار الما سحكه

امجلجل العاكول بيه ولا وصل ماي العركهه

اسم الله من تعثر تكلك وتدري متعمد

حركهه

وحركتها

رماد ظلت

بس تهزه الريح تقرالك سلام

***

صدكيتك

وانته جذبه ومستحي منه الجذب

مسني جنحك لني ماكو ولا تحت

جدمي درب

لك دخيلك

ولفلفتني بسم عباتك تنهب كليبي نهب

شلون صارت

عميه روحي لوجنت أعمه كلب

بيدي الزمك تلعب بروحي لعب

وانه متونس والوز بالكلام

***

حيل كلفه

رهمت وما فرزنت

جيت الي ضايع حبيبي وانه بعيونك ضعت

ولمني رمشك واهجس استوني عشت

وسلمتك كلي بيدي لو شريت ولو بعت

واغفرتلك ألف زله وكلت يسحكهه الوكت

واعتذر لك وانته بالسجين لكليبي تعت

أبراسي طاحت شنهو ذنبي وتنتقم مني انتقام

***

ابياهي أعاتب خلي أصدك حتى ابدي بعتبتك

وانته لسه أبخاطري طولك حمام

شلون أصدك حيل كلفه حسرتك

شلون أصدك

وفوك روحي تراب تنكث غيبتك

شلون أصدك

وانته بيدك كلبي وقته على كلبك

ودكته صارت دكتك

ومن صفينه بنبض واحد

والورد نده على طولك

وأيدي تقره

اشكد حجالي الورد عنك

وشكثر مرجحته لكليبي أبدلال

يا زلال ألما يصح مثله زلال

ويا غزال جم غزال أبعينه يضحك جم غزال

وأيدي تقره

شكد شربت الماي منك

وسيست كلبي على طولك يضوي

بشموع الغرام

ابهيده بجناحك تهفي له وينام

وتالي من كضبة جذب تزلك يبو طول الحمام

والله خالي أتراب رجلك من تنفضه أبيتي

أجمعته ذهب

 وانته نخله اشكد أموت عليك من يضوي الرطب

وحبه حبه وبيدي الكط وانته نايم

وعلى طولك غافي عنكود العنب

ورد أشمك رد لي روحي مفرفحه من غيبتك

ويا حمام البيت راعي البيت يتنه امروتك

أبروحك احلف وانته كدهه

ويلحمامه أروحيتك

ترف على كليبي كبل موتي وانه كليبي

ملام

صدك يلطولك حماك.

 

                                (ميت أنا)

 

ميت أنه ولا خط يجي  عن موتك

 

سوده وحشتك يولدي حرموك من تابوتك

 

مشجوله ذمته المرمرك  لا تبري ذمته مروتك

 

ما ناح طير على الشجر الا على نغمة صوتك

 

***

 

حيل أدلهمت يا نبع كلبي وكمرنه أمدمه

 

أبموس الخناجر تاكل  ابلحمه تفطر النجمه

 

عميه وتدور أرويحتي بيابير أدور يمه

 

وما  أظن بعد تطلع شمس وتوول هاي الغمه

 

وفركاك فت مرارتي وضاكت عليه الجلمه

 

لا كبر واتهدل أله

 

والهم أترابه وأسأله

 

الكلب صاير كربله

 

ولا خط يجي عن موتك

 

***

 

يتنفس أبشفته الورد والنجم غافي أبرمشه

 

هد حيلي موتك  يا حلم يبس الطسر أبعشه

 

أنجان مت أبلا كبر آنه كبر يتمشه

 

بلجن تفز أرويحتك يوم وتطير الوحشه

 

والكاك أقفلك بالرحم وأنطيهم أذن الطرشه

 

يا حلم ما رد الهله

 

وصدره رصاص ومنقله

 

الكلب صاير كربله

 

ولا خط يجي عن موتك

 

***

 

ما تخلص أكبور البلد دفتن ينخه بدفان

 

ومشله أشليله الشفل ويطمها عدله الشبان

 

يا ريت ما جبتك ولا  هلهلت يمه النسوان

 

يصل عظمك بسن الشفل وتاكل بعينه الغربان

 

وأوكع وأتل أرويحتك وأجبّح على البيبان

 

ما رد حلم عايف هله

 

ولا طير يعرف واسأله

 

الكلب صاير كربله

 

ولا خط يجي عن موتك

 

• < السابق
• التالي >