كـتـاب ألموقع

حزن اهوار ... !// عبد الرضا المادح

• 

تقييم المستخدم:  / 1

سيئجيد 

المجموعة: عبد الرضا المادح

تم إنشاءه بتاريخ الجمعة, 20 أيار 2022 20:58

كتب بواسطة: عبد الرضا المادح

الزيارات: 1410

عبد الرضا المادح

عرض صفحة الكاتب 

حزن اهوار ... !

مرثية الى شراع السفينة الذي ابحر بعيداً ، الى الثائر مظفر النواب

عبد الرضا المادح

ناحت مرادي الهور

واهتزت مشاحيفه

وفز صويحب من نومته ،

يريد يشيل تابوتك

صدگ ياشهم

تعوف الدار تاليتك ؟!

حزين الهور

ينشدلك مواويلك ،

وبطگت الفجر

على شباچ الفرح

غرد بلبل البستان

جایب تين

يريد يقوي عافيتك !      

ولن الوادم الملتمين

كلها تصيح

مفجوعين ...

مفجوعين ...

.....

وبساحة التحرير

هلهلن اشعار ثوريات

تتنطر مراسيلك ،

لچن وسفه !!

إجانه الخبر بونين ،

وهبت تماثيل الجدار تنوح

وبحرگه ملتاعين !              

وآنه راح انصبلي خيمة حزن ،

جوّه النصب

و دِگْ گهوة

واطحن تتن نرگيله !

" وروحي اعله روحك تنسحن " *

وأصفن ... ودندن ...!

" حسافه انچفت دلتنه " !! *

.....

 حمد و الريل صاح بقهر ،

وهد الحيل  !!

شايل خشبة التابوت

متراس إعله الجسر

للناس توصيتك ،

وبدل دخان ريحة هيل

تطش فوگ الربع

احلام تربيتك ،

" وشلون اوصفك وانت دفتر ...

 يميزان الذهب " *

بهوسات تشييعك ؟! 

وإعْلَ النعش ،

حَطّن " زرازير البراري " *

" إيشيلن بيرغ الدفنه " *

يودعن زلمتنه المعگل

"وبنات كحيل ملتمات " *

ايردسن بالمشاعر حيل

وبهداي سالت دمعة الحلوات

على خدود الوطن ،

 ترچية تلاليلك 

وجيفارا البطل ينخاك ،

تِضل بمناجيل العشگ ،

ترسم بساتينك !

عبد الرضا المادح

2019.11.29

** توفي الشاعر الكبير مظفر النواب بتاريخ 20-05-2022 ، القصيدة كتبتُها عام 2019 على أثر خبر كاذب بوفاته.

• < السابق
• التالي >