كـتـاب ألموقع

جاري مرشح... حلفني ما أنتخبه! -//- د. مزاحم مبارك مال الله

• 

تقييم المستخدم:  / 0

سيئجيد 

المجموعة: مزاحم مبارك مال الله

تم إنشاءه بتاريخ الجمعة, 05 نيسان/أبريل 2013 18:44

الزيارات: 2424

جاري مرشح... حلفني ما أنتخبه!

د. مزاحم مبارك مال الله

بلله اكو واحد يصدّك هذا الحجي ؟بروح ابوك اكو مرشح للأنتخابات يحجي ويه الوادم ويكلهم .. لاتنتخبوني !

لا ، مو بس هيَج ،والنوب يحلفهم..

آنه عدالي هذا الزلمة موش تمام ،بس ياجماعة الخير ،أذا موش تمام شلون يرشح للأنتخابت والمفوضية وافقت عليه؟ جا لا هو مريض ولا هو مشمول (بالأجتياح)، العفو،الاجتثاث..وبعدين أنه أعرفنه صارلي سنين طويلة وياه ما بدت منه العوجة.

جاري خوش جار،أنه أعرفنه كلش زين ،دومه يدافع عن الحكك ،ودومه دمعته بطرف عينه على الشعب والبلد ،يلوب ـ أنهجم بيتي ـ من الطائفية ومن الفساد الاداري والمالي ،يقره هواي ويسولف خوش سوالف ،تردون الصدكك، من سولفلي يلله افتهمت ليش امريكا جاية لهنا ،ويلله افتهمت ليش اكو فقير واكو زنكين ،وتردون الصدك النوب ،جاري هذا عنده لسان يدوّخ ،حجيه كله صحيح ،أنهجم بيت أبوه ..طركاعة شنهي هل العِلم اللي عنده !

سمعوني يهل الربع ،حكك الجار ع الجار ،لفيت عباتي جوة أباطي ورحت أسيّر على جاري المرشح ،لازم أوكف بالشدات ،والحجي بيني وبينكم وكفاته وياي كلش هواي.

•     ها خوية شجاك ،شلون تكول للوادم لا تنتخبوني ؟

•     جا انت موش بهاي القايمة مالة العدالة والديمقراطية؟

•     شنهي بطلت من العدالة ؟لو بطلت من الدميقراطية ؟

تنحنح وعدل كعدته ،وباوعلي وكال:

ـ شوف أبو مظلوم :أي صحيح أني أكول للوادم لاتنتخبوني، بس شوكت ؟!

لاتنتخبوني أذا ما تشوفون تاريخي اللي كظيته بخدمة هذا البلد ،ولا تنتخبوني اذا مو ايدي بيضة ونظيفة ،ولاتنتخبوني أذا ما عندي برنامج يختلف عن الباقين ،ولا تنتخبوني اذا عرفتوا تجيني فلوس حرام ،ولا تنتخبوني اذا طبعت فليكسات وصور اكثر من الاصوات اللي انتظرها ،ولا تنتخبوني اذا سويت عزايم لو اوزع موبايلات من هاي الجديدة اللي اسمها (آي باد) ـ مدري شنهي، الفلك طرهم ـ ، ولاتنتخبوني اذا هددت واحد أو حلفته الاّ ينتخبني .. آنة ما عندي غير جم صورة على جم فليكس واجمع تبرعات من الخيرين ،عندي طاولة مستديرة وأدكك البيبان والطبيب الجوال ولعب رياضة هنا وهناك ،لجن وأنت تعرف يابو مظلوم أنه عندي التاريخ والموقف، آنه أحاجج الحكومة وأفضح دكايكها ،انت يبو مظلوم جاي تحس بالظلم لو لا له ؟جا هية شنهي ،الله شافوا بالعين لو عرفوا بالعقل، يابعد روحي!

•     تردون الصدك حجي الريال كله صح ..وآنه مقتنع بكل جلمة كالها ،وراح أصيح وياه لا تنتخبون ،لا تنتخبون ألاّ الاصيل الشريف ،أبو حجاية الصدك أبو العدالة ،أبو الديمقراطية ، ملينا ومليتوا من الوجوه المصخمة بدكايكها ..

•     والله ثم والله ما أنتخب ألاّ جاري الطيب اللي ما شفت منه لولوة، وراح اكول للوادم انتخبوا جاري .. بس وداعت جهالي.. ما أحلفهم!!

• < السابق
• التالي >