كـتـاب ألموقع
الاوسط ولا وحدة ..تفوز بالانتخابات! -//- د. مزاحم مبارك مال الله
/ 0
- المجموعة: مزاحم مبارك مال الله
- تم إنشاءه بتاريخ الأربعاء, 10 نيسان/أبريل 2013 16:26
- الزيارات: 1734
الاوسط ولا وحدة ..تفوز بالانتخابات!
د. مزاحم مبارك مال الله
قائمة تحالف العدالة والديمقراطية العراقي 422
من يوم اللي علنوا عن بداية الحملة الانتخابية ،تشوفنه أنة ولمة ربع خيرة من أهل المحلة نتجمع ،ونظل نكرط بهل السوالف ،على هاي الأنتخابات وعلى المضت وعلى الجاية ،ومن هاي السوالف اللي تسولف بيها كل الوادم .
لكن اليوم خطرت أبّالي شغيلة ،شو من سولفتها للجماعة ،خربوا من الضحك ،وكالولي ،بروح أبوك أحجينا التفاصيل.
كلتلهم ،أسمعوا ياجماعة الخير ،على واهس الانتخابات وصخونة سباق الفليكسات ،(ندسني صاحبي وكالي موش صخونة ،أسمها حمى) ،أتخيلت أن تتنافس وزاراتنا العتيدة السيادية وغير السيادية ،الخدمية وغير الخدمية ،الانتاجية والاستهلاكية ، أتخيلتهن كلهن ،يدخلن بأنتخابات جماهيرية ،شعبية ،ونشوف بلله ياهي تفوز بكرسي "أفضل وزارة لهذا العام"!
ربعي ظلوا فاكين حلوكهم ..وبلمح البصر ،جنهم متواصين ،سألوني :أي وبعدين أبو مظلوم ؟!
أنة هم صرت عودين قصخون ،وكمت شوية أتمازح وياهم وكلتلهم:
ـ شوفوا ياجماعة الخير ،أكو وزارات أنشملن بالترشيق (يعني أبو أسراء طببهن ساونة ومنع عليهن الأكل والشرب، وترشقن)، هذني يمعزوزين عيني، مامشمولات بالأنتخابات الوزارية مالتي ونفذن بجلدهن، نجي على الباقيات، شو هذني وحدة أحسن من الاخرى بسوء الأداء والشغل!
ـ نط عليه واحد من الجاعدين وجنه يحجي بعصبية :أكلك أبو مظلوم شو سويتها قصة ،دحجي شعندك وفضها !عضيت أصبعي وكلت وية روحي: أخ أنة أبو مظلوم،
ـ أسمعوا ياجماعة الخير،خلوني أحجيلكم ع الوزارات:
• وزارة الدفاع ،ماشفناها أدافع عن البلد من المؤامرات الخارجية اللي يكول عنها الريس !
• والداخلية فالحة بالسيطرات والازدحامات ،الله وكيلكم كل فائدة ما بيها
• !الخارجية ،ملتهية بالزواكة
• التخطيط ، مثل المطبخ بلايا مسواكك !
• المالية، أسمها أكبر منها !
• والنفط : وزير بلا وزارة !ووزارة بلا نفط!
أما الباقيات فالحجي عنهن يبّجي ،الصحة ،لو يسمونها وزارة الأمراض أحسنلهم! التربية : جا وينها التربية ! الصناعة والزراعة والبيئة والموارد المائية ، ههههه!
التجارة ، أشهد ما بالله أزدهرت كلش التجارة عدنة، وصار الميزان التجاري بعين وحدة موش بعينتين !الثقافة : تذبح بالعقول اللي بيها ! وغيرهن وغيرهن ، أما وزارة الكهرباء : فهاي صدك الوزارة الصلفة!
ها جماعة الخير ،شو ما تجاوبون ؟ شو سكتوا ! يلله ما تنتخبون ،شتكولون يا وزارة الزينة ؟
ـ نب علية واحد من الربع وكال :خوية أبو مظلوم ،شو جنها لايصة وكل الوزارات فاشلات، ولا وحدة تفوز بأنتخاباتك ،يعني أذا صوت الشعب على الوزارات هاي ، شراح تكون النتيجة ؟
ـ صحت بأعلى صوتي وكلت ، وزارة وحدة راح تفوز بمحاصصتهم ،
تدرون يا هي ؟
كالوا يا هي ، آنة أكلكم :
وزارة الفساد الاداري والمالي ،والباقي بلا بوش !
• ورة هذي السالفة تدنوا الربع يمي وكالوا ،جا كول ما ننتخب مجلس المحافظة، شو جنها وحدة تشبه الآخرة ..
• أسمعوا يهل الربع ،أحنة من نحجي هذا الحجي ، يعني نص الأيمان بالوطن والشعب ،والنص الثاني بتغيير هذا الوضع وننتخب الزينين اللي تكتب عنهم جريدة طريق الشعب يومية! مو تسوون نفسكم عميان لو طرشان ، وانة ادري بيكم ، واحدكم يصير فيلسوف بالشدات، جا جاي أحجيها والعاقل يتصل بالرقم 422
• وبروح أمي، العافية تدارج مثل ما كال فهد وابو داود .
المتواجون الان
577 زائر، ولايوجد أعضاء داخل الموقع
