كـتـاب ألموقع

سلسلة "سوالف الشعب"-1 -//- مزاحم مبارك مال الله

• 

تقييم المستخدم:  / 0

سيئجيد 

المجموعة: مزاحم مبارك مال الله

تم إنشاءه بتاريخ السبت, 27 نيسان/أبريل 2013 08:20

الزيارات: 1905

سلسلة "سوالف الشعب"-1 –

مزاحم مبارك مال الله

بالليل تعللت يم ابو العدالة ورحت أتشمشم اخبار الأنتخابات لأن صارلي وأنتم الصادجين خمسين يوم ما شايف طعم النوم ولاالراحة ،لأن هذا يوم الامتحان، والنتيجة لو ناجحين وعازلين اللي طلعنا عليهم مظاهرات بساحات التحرير أو على أقله صعدنة فد واحد، ثنين لو ثلاث بالمجلس حتى يصيرون سجيّنة خاصرة للحرامية والمنتفعين، لو راسبين بهاذ الامتحان وهاي معناتها حجي هواي، باب جاري الطيب مفتوحة على طول ،دشيت:

•     الكوّة

-    الله يكويك خوية ابو مظلوم ،هلة بيك

•     بشرني يبو العدالة شنهي الاخبار؟حمامة غراب؟

-    أنشاالله خير

•     جا طبعاً أنكول أنشالله ،قصدي ،ماسمعت خبر منا ،منا ع النتايج؟

-    شوف يبو مظلوم ،كلش هواي وادم ما أنطت صوتها، وأكلك ليش، اولاً شعبنا بعدة لحد هسة عايش بالخوف والرعب ولا تنسى هم القوات الامنية(عود أسمها أمنية الله يجرّم) خوفّت بالناس ،ثانياً وشعبنا نوبة الاخرة بعده مو بذاك الوعي، لكن أهم من هاي وذيج شعبنا زعلان بأدب !

•     أبو العدالة فدوة أروحلنلك آنة كلش تعبان وغلغ، لاتحجي ألغاز ،يعني شنو مو بذاك الوعي؟ وشنهي زعلان بأدب ؟

-    مو بذاك الوعي يعني ما يعرف مصلحته وين، وزعلان بأدب يعني ما عاجبته الحكومة ولا السياسة ،هسة هم هاي صعبة؟

•     خوش ،النوب بعد شنهي؟

-    والناس هلكد ما ملت وجزعت وفقدت الثقة بالحكام والسياسة ما راحوا وحدثوا المعلومات بسجل الناخبين،

•     بس يبو العدالة خوية شو مكانات الانتخاب فارغة جوّة ،لكن أزدحام برّة

-    طبعاً لأن الناس أدوّر على أسمائها وماتلكاها

•     يعني لعبة من الحكومة خوية؟ لو من المفوضية؟

-    لا يبو مظلوم ،من المفضوحكية

•     كلت بصوت عالي/ شنهي! المفضوحكية شنهي النوب ،ها شو هم كمت تحجي الغاز؟

-    صح، الشعب يحتاج وعي اكثر ،لكن موش كلش غشيم ،ويعرف أن الكتل الجبيرة كلشي مستعدة أتسوي ،يوم تزوير ويوم جيش المختار ويوم تخوف بالناس ،ويوم تخربط الاسماء ،جا حتى النقل ،دكلي وينه السيارات اللي كالوا عليها تنقل الوادم لمراكز الانتخابات، زين واللعبات اللي سوها، شي مستمرين بالدعاية يم المراكز الانتخابية ،وشي أمخلين اللي يحرسون المراكز من القوات الامنية أتكل للناس أنتخبوا فلان والقائمة الفلانية ،وقسم أخرّوا المراقبين ساعة كاملة بحجة ممنوع دخول الموبايلات والدفاتر والاقلام، عودين هاي تعليمات من العمليات، وشي كالوا للمراقبين أخذ نتيجة الفرز مال المحطة مالتك وماعليك بالمحطات الباقية و..يعني بصريح العبارة كل وسائل التزوير والتحوير

•     خوية يبو العدالة ،ترة أفتر دماغي ،شنهي هل الحجي ،معقولة؟ يعني كول تفجير العامرية هم ألهم أيد بيه؟

-    كلشي يصير يبو مظلوم ،كلشي ممكن.

•     وانت ،انت بعد أخوك ما جاك خبر من جماعتك؟

-    أكلك أبو مظلوم ،صحيح المطلوب نكسر سلسلة أحتكار السلطة ،لكن هاذ مو كل شي ،الليجري هسة هو جزء من النضال ،جزء من العمل اللي يستمر بدون توقف ،يجي يوم هو الشعب يطلع وينادي بالانتخابات الديمقراطية ولزمن يحققونها ،مثل ما جاي يصير بدول أميركا اللاتينية

•     ما تصير ،ما تصير عدنا يبو العدالة،

-    ليش عود شنهي أحنة وحد ،شو الظلم هو هو، والشعوب هي هي

•     آنة أكلك ما تصير؟ أسمعها مني ،أحنة مو مثل ذولاك المو تينية!

-    أبو مظلوم مو تذب الحجاية وتعوفها، أولاً مو أسمها دول المو تينية ، أسمها دول لاتينية ،وبعدين لزمن تكلي ليش ما تصير

•     لأن أحنة ما نعرف نحجي مثلهم انكريزي

-    شفت موش أكلك يحتاج وعي ،الشعوب اللاتينية ما تحجي أنكليزي ،تحجي مثلنا بلغة الضيم والظلم ،بس الفرق همّ يصيحون وأحنة نتشاور!

• < السابق
• التالي >