كـتـاب ألموقع

سلسلة "سوالف الشعب" (3 ) -//- مزاحم مبارك مال الله

• 

تقييم المستخدم:  / 0

سيئجيد 

المجموعة: مزاحم مبارك مال الله

تم إنشاءه بتاريخ الثلاثاء, 14 أيار 2013 11:27

الزيارات: 1930

سلسلة "سوالف الشعب"

(3 )

مزاحم مبارك مال الله

التمينا مرة ثانية انة والربع براس العكد وهللمرّة صرنا اكثر من كبل وكلها دقايق واجه ابو العدالة ،تراهو ما يعوف هاي الكعدات ولزمن يجي حتى بعز الحر لو حتى ورة غروب الشمس يجي يعني يجي، وهو يكول "أحنة نجتمع بالحزب أبيناتنا يعني وية الرفاق والاجتماع الحزبي محطة وقود نتزود بيها بالطاقة الفكرية والتنظيمية ،وهاذ هم أجتماع لكنه وية الناس ،وبصراحة الاجتماعات هاي وية الناس تخليني أغرد مثل البلبل بالاجتماع الحزبي"، المهم جنة أنسولف أبيناتنا ع الانتخابات أوواحدنة صار يلصلص على أصابع الجاعدين ،يريد أيشوف منهو الراح / منهو الماراح !

•     ها خوتي احنة الجاعدين اثنعش واحد، شو بس اربعة مصبغة اصابيعها جا وانتم الباقين شنهي، ويانة!؟ علينا!؟فهموني بالسالفة

-    نب واحد علية/ شوف أبو مظلوم ،معليك بغيرك ،ولاتحشر روحك ،وما عليك ألاّ بنفسك ،نريد ننتخب ما نريد بكيفنا ،جا موش هي ديمغراطية لو لا له !

•     بوية علكيفيك يبو معليك ،شنهي سبينه العنب الاسود ،علكيفك عمي ، هسة أنة كلت شي موش صح ،أربعة من اثنعش مشاركين ،جا عود شوكت تنتخبون الزين؟ بس بيكم الحجي ،الحكومة موش زينة، الحكومة ما سوت فلان شي ،وين المدارس ،وين المستشفيات، الاجور عالية ،الشوارع ما أمبلطة ،غركنا بالمطر ،جا من أنهجم بيت أبوكم ،والله هاذ نفاق وغش!

-    تدخل ابو العدالة وكال: ياجماعة الخير ،شمالكم ،شجاكم ؟السالفة ما تستوجب العصبية،

•     بروح موتاك،  يبو العدالة ،حجايتي بيها شي يزعل، دا أكللهم أنتو مو تحجون ع الحكومة وحجيكم كله صح ،أي خوش ،جا هسة الفرصة أجتكم، وأنتخبوا الشرفاء الزينين.

-    أبو مظلوم خوية كلامك صحيح ،بس لاتنسى الناس مصدومة وفقدت الثقة من ورة هل المصايب الجاي تصير بسبب المحاصصة

•     اسمعوني يهل الربع، والله وبالله وتالله ما راح يتغير الوضع اللي جاعد تحجون عليه الاّ اذا تبدلون تفكيركم هاذ

-    ابو مظلوم ، شبيك اليوم شو حمكان، قناعات الناس ماتجي بالساهل ،على كيفك وية الوادم

•     أسمعني يبو العدالة ،الخيرين الجاعدين جدامك ،همّ لو خيالاتهم ؟

-    لا همّ بلحمهم وشحمهم

•     خوش ، جا اذا يحجون ع الحكومة ، ليش ما يبدلونها ؟

-    هي الشنهي يبدلونها ؟زبون مال الخلفوك! دشداشة مال السركال! عباية مال حبوبتك ؟عمي هاذ صراع ،صراع، حتى الحرامي صلف وما يستحي ، لايعترف بالبوك مالته ولا يعوف الكرسي، والفاسد والغشيم اللي بيهم يظلون يسندون بيه ويخلونة يفوز علمود الكتلة مالته تستفيد منه

•     جا شنهي الحل برايك خوية؟ ،أنت، أت بالحزب مالكم ما يكلولك شنهي الحل ؟لأن وأشهد ما بالله أنتم يالحمران خوش تفسرون وسولفكم معدّلة

-    اسمع يبو مظلوم الحزب حجاها من زمان ودومه يكول، الحل بأيد الشعب ،مو اكو جهة فاسدة ، طائفية ،محاصصاتية ،ماتبني البلد ؟

•     كلهم كالوا : أي أكو

-    خوش الحزب يكول لازم كلحنة أنحط أيد بأيد علمود ندخل بالانتخابات ونفوز على الفاسدين

•     كلهم كالوا :أي والله صدج حجايتك يبو العدالة ،ولزمن أنصير أيد بأيد

صرخ أبو مظلوم مستهزئاً متأبطاً عبائته تاركاً المجلس : أي تمام مهو أمبين من أصابيعكم!!!

• < السابق
• التالي >