كـتـاب ألموقع
سلسلة "سوالف الشعب" (6) -//- مزاحم مبارك مال الله
/ 0
- المجموعة: مزاحم مبارك مال الله
- تم إنشاءه بتاريخ الجمعة, 17 أيار 2013 18:40
- الزيارات: 1912
سلسلة "سوالف الشعب"
(6)
مزاحم مبارك مال الله
- مدري وين يلكون هاي الاسامي ،سانت ليكو ،سانت لكو ،سانت ما لكو، ومدري شنهي ،والنوب طركاعة الكوتا والموتا ..
• أبو مظلوم ،أبو مظلوم
- ها أبو العدالة ،هلا ،هلا،
• شبيك ،شنهي؟ جاعد يتراوالك؟ ،شو جاي تسولف وية روحك؟
- أبو العدالة، صكد خوية النور بالقراية والكتابة، بس العتب على هلي، جيف ما خلوني أكعد بالكتّاب، هسة آنة لو اعرف أحجي مثل الأفندية مال البارحة اللي طلعوا بالتلفزيون ،جان عرفت شلون أحجي وية اللي كعدوا ابمجان أصديم على نفس الكرسي.
• يا أفندية ،يا كرسي؟ هاي شبيك أبو مظلوم ،شني مصخن ،أوديك للطيب ، شو جاي، جاي ..
- كولها ،جا بعد شخليت؟ أي كولها ، جاي أمهذر موش؟!
• العفو أبو مظلوم ،العفو ،بس من خوفي عليك،
- لا ، لاتعذّر،اللي يحجي الصدك ،أطلعون عليه ألف سالفة!
• وداعتك مو هيج ،بس فهمني يا أفندية ،شنـ ..
- أنت موش كتلي دير التلفزيون ساعة تسعة بالليل على الحرة عراق ،مدري مرّة عراق ،علمود أستاد جاسم الحلفي رايح يطلع؟
• أي صح ،شنهي المشكلة؟
- جا غير كام يغرد بعد ألساني ألسانه ،كاللهم ،أحنة ما نعرف ليكو،أحنة نعرف شي واحد ،مصلحة الشعب ،خدمة الناس ،ونحط ايدنا بأيد أي شريف ونزيه يخدم، وشوف ،أنوب شكال:
• شكال؟
- كال،"وأني أنصح اللازمين الحكم أن يقدمون الحرامية اللي يعرفونهم للمحاكم"، بعد حلكي حلكك أستاد جاسم..
• يعني أنت البارحة تونست ع الحجي
- أي كلش وحياة أبوك ،وأفتهمت من الزلمة، لايحبون الطائفية، ولا هاذ ألك وهاذ أللي، ترة يبو العدالة حجاية العدلة مريودة، شنهي ألقاب ،شنهي طوايف ،شنهي هاذ بغدادي وذاك مصلاوي وهاي بصراوية، كلحنا عراقيين وخلص، والسبع اللي يعبي ركي بالـ ..
• بس الربع مقهورين من قانون الانتخابات وضايجين، يردون يبلعون الاول والتالي، الدك والمدكوك ع الانتخابات الجاية
- جا احنة ما عولنا خلصنا من هدام اللي طببنا بالحروب ،أجو الربع طببونة بالطائفية، وسوولك الدولة دكاكين كل واحد يخمط بكيفه
• أبو مظلوم، الشعب أفتهم، وداعتك اليوم عشر مقاعد ،باجر يصيرن عشرين، وأذا عبرت السنين الماضية شغلة الطائفية والمناطقية ،ترة منّا
وغاد ما تمشي هاي السوالف، يعني هسة أنت، أنت هم تسأل الواحد: من يا عمام، لو شنهي مذهبك؟
- طبعاً ما أسأله ،لأن أستاد جاسم البارحة كال "علاقتنا بالشخص اللي يحب الوطن ،يخدم الوادم ،أيدة نظيفة، لا ،لا، لزمن ما أسأل،
• أي عفية عليك خوية
- عود صكد أبو العدالة ،ردت أسألك، هاذ ليكو،شنهو عُربي ،أنكريزي ؟
• فرنسي
- وأستاد جاسم ،أصله من الحلفاية ؟
• ها ، ها.....يبو مظلوم جا شحجينا صار ساعة؟
- علكيفك بوية ،علكيفك ،عليمن جاي أتصّيح ،جا ردت أنشدك ،يا حجاية ردي لمجانج
• لا موش ردي لمجانج ،من الصبح لهسة أنكول يمعودين عوفوا الالقاب، عوفوا الطائفية، عوفوا المناطقية ،أنريد الناس تتعايش بالسلام وبالمحبة ،يعني ما يصير الواحد يبني الوطن ويخدم الشعب الاّ بأسم الطايفة وبأسم المذهب ،هاذ شلون حجي؟
- فدوة اروحنلك خوية، كون زعلت عليّة؟
• لا ما زعلت ،أبو مظلوم أحنة بمعركة جبيرة وماكو مجال للضعف، جا شدكول أذا أسولفلك الجماعة شسووا بالانتخابات هاي علمود يفوخون كلبهم من قانون سانت ليكو؟
- أكيد سووا قانون لغفو ...!!!
• اي والله يبو مظلوم ، لغفو، وبلعوا أسماء الوادم وما خلوهم ينتخبون
- أكلك خوية أبو العدالة ،ولو أنت ماخذ على خاطرك مني ،هاي الافكار الجهنمية ، بروح أبوك أمنيلهم ؟
• هههههههههههههههههها!!! خخخخخخخ!!وحياة جدي انت كلتها اللي يقرة ويكتب ... يعرف الصدك من الجذب ..
المتواجون الان
770 زائر، ولايوجد أعضاء داخل الموقع
