كـتـاب ألموقع
چم مره نموت...؟// ميسون نعيم الرومي
- المجموعة: ميسون نعيم الرومي
- تم إنشاءه بتاريخ الجمعة, 19 حزيران/يونيو 2020 19:08
- كتب بواسطة: ميسون نعيم الرومي
- الزيارات: 2379
ميسون نعيم الرومي
چم مره نموت...؟
ميسون نعيم الرومي
چم مره نموت
ابسكته وابلا صوت
اوجم مره نطرز الليل
نجمه ابأثر نجمه
واشكثر عبرات
مخنوگه بالصدر
ملهه الصبر
تحبس الونه
***
اشچم حلم مذبوح
ينضح ألم
ينزف حزن
وادموع تچوي بالجفن..
ضاعت ابزحمه
نصفگ الراح ابراح
جرح الگلب ما ينلاح
ضايع أملنه
***
تعلمنه الوجع
من ذاك يوم انولدنه
امغرب اوشايل گمرنه
اسنين العمر ظلمه
العين تربي للبعد
واطيور التحومي اوترد
مكسوره هدهه الوكت
من محنه تطلع محنه
***
ليوين يلتم الشمل
ليوين نبقه اونشتعل
واموجره نار البضلع
ليوين يا دنيه اونصطبر
واسنين تطحن بالعمر
ناعور يفترحاير
يغرف ابدهله اوچنه
ليوين نترجه امن الأمل چلمه
ليوين نرجه امن الفرح مزنه
ليوين .. ليوين ؟
----------------
حزيران / 2020
ســتوكهولم
المتواجون الان
999 زائر، ولايوجد أعضاء داخل الموقع